आज (27 एप्रिल) मोहिनी एकादशी आहे. वैशाख महिन्यातील शुक्ल पक्षाच्या एकादशी तिथीला मोहिनी एकादशी व्रत केले जाते. या दिवशी भगवान विष्णूंच्या मोहिनी स्वरूपाची पूजा-अर्चा केली जाते. अशी मान्यता आहे की याच तिथीला भगवान विष्णूंनी मोहिनी रूप धारण केले होते, म्हणूनच या एकादशीला मोहिनी एकादशी असे नाव पडले.

पौराणिक कथा अशी आहे की, समुद्रमंथनाच्या वेळी जेव्हा अमृत प्राप्त झाले, तेव्हा देव आणि दानवांमध्ये ते पिण्यासाठी युद्ध सुरू झाले. बळाच्या जोरावर देव दानवांवर विजय मिळवू शकत नव्हते.

अशा स्थितीत भगवान विष्णूंनी मोहिनी रूप धारण केले आणि दानवांना आपल्या मोहात बांधले. मोहिनी अवताराने देवांना अमृत पाजले, ज्यामुळे देवांना अमरत्व प्राप्त झाले. ही घटना वैशाख शुक्ल एकादशी तिथीला घडली होती, म्हणूनच याला मोहिनी एकादशी म्हटले जाते.

एकादशीला स्नान केल्यानंतर भगवान विष्णूंच्या प्रतिमेसमोर तुपाचा दिवा लावून व्रत आणि पूजा करण्याचा संकल्प करा.

एका कलशावर लाल वस्त्र बांधून त्याची पूजा करा. भगवान विष्णूंची प्रतिमा स्थापित करा.

प्रतिमेला स्नान घालून हार-फुले आणि नवीन वस्त्रांनी श्रृंगार करा.

भगवान विष्णूंना पिवळी फुले, तुळशीपत्र आणि पंचामृत अर्पण करा.

धूप-दीप प्रज्वलित करा. फळे आणि मिठायांचा नैवेद्य दाखवा.

रात्री जागरण करत देवाच्या मंत्रांचा जप करा, भजन-कीर्तन करा. या व्रतामध्ये केवळ फलाहार केला जातो.

दुसऱ्या दिवशी म्हणजेच द्वादशी तिथीला सकाळी लवकर उठा आणि स्नानानंतर देवाची पूजा करा. पूजेनंतर गरजू लोकांना धान्य, बूट-चप्पल, कपडे, पाणी, माठ, धन दान करा. भोजन द्या. त्यानंतर स्वतः भोजन करा. अशा प्रकारे हे व्रत पूर्ण होते.

अशी मान्यता आहे की, या व्रतामुळे मन आणि शरीरात संतुलन राखले जाते. अडचणींशी लढण्याची शक्ती मिळते. हे व्रत यश आणि कीर्ती वाढवणारे मानले जाते. असे म्हटले जाते की, या व्रतामुळे भय आणि संशय दूर होतात. भक्त सर्व प्रकारच्या मोहापासून दूर राहतो, म्हणूनच याला मोहिनी एकादशी असे म्हटले आहे. या व्रतामुळे व्यक्तीच्या पापांचा क्षय होतो. भक्ताला समाजात मान-सन्मान मिळतो आणि अडकलेल्या कामांमध्ये यश मिळते.