अजित पवारांच्या निधनानंतर बारामतीची निवडणूक बिनविरोध होणार असल्याच्या चर्चांना आता पूर्णपणे वेगळे वळण मिळाले असून, ओबीसी नेते लक्ष्मण हाके यांनी या निवडणुकीच्या रिंगणात उतरण्याची तयारी दर्शवली आहे. बारामतीतील कार्यकर्त्यांच्या आग्रहाखातर आपण ही निवडणूक लढवण्यास इच्छुक असल्याचे सांगतानाच, हाके यांनी अत्यंत टोकदार शब्दांत आपली भूमिका मांडली. दादांच्या निधनानंतर तिसऱ्याच दिवशी जर शपथविधी होऊ शकतो, तर आम्हीच केवळ त्यांच्या निधनाचे दुःख का व्यक्त करायचे? असा खोचक सवाल करत त्यांनी ही निवडणूक लढवण्याचे संकेत दिले आहेत, ज्यामुळे बारामतीच्या राजकीय वर्तुळात मोठी खळबळ उडाली आहे. लक्ष्मण हाके म्हणाले, बारामतीत जाऊन निवडणुकीसंदर्भात सर्व कार्यकर्त्यांशी चर्चा करणार असल्याचं लक्ष्मण हाके म्हणाले. कार्यकर्त्यांसोबत व्यापक बैठक घेऊन निवडणूक लढवायची का आणि कोणी लढवायची याबाबत निर्णय जाहीर केला जाईल, असे हाके यांनी स्पष्ट केले आहे. लक्ष्मण हाके पुढे म्हणाले की, बारामतीतील एका वैद्यकीय महाविद्यालयाला देण्यात आलेले अहिल्यादेवींचे नाव बदलण्याचा जीआर हे शासन काढू शकते, आम्ही ते कधीही सहन करणार नाही. ओबीसींचे कोणतेच प्रश्न स्वर्गीय अजितदादा किंवा या सरकारने सोडवले नाहीत, आमची कोणतीही मागणी मान्य केली नाही. विद्यार्थ्यांची शिष्यवृत्ती असेल किंवा होस्टेल असेल असे अनेक विषयांसाठी आम्ही झगडत होतो मात्र त्याला न्याय कधीच मिळाला नसल्याचे हाके यांनी म्हटले आहे. लोकशाहीत निवडणुका बिनविरोध होणे चुकीचे आहे. दादांच्या निधनानंतर होत असलेली निवडणूक ही अनुकंपा म्हणून आम्ही मानायची का? असा सवाल लक्ष्मण हाके यांनी उपस्थित केला. ते म्हणाले, दादांच्या निधनाच्या तिसऱ्या दिवशी हे शपथविधी करतात. आजोबा, नातू अधिवेशनाला निघून जातात. मग दुःख फक्त आम्ही करायचे का? असाही सवाल हाके यांनी उपस्थित केला आहे. लक्ष्मण हाके म्हणाले, आमच्या ओबीसी समाजाचे आरक्षण एका बाजूला संपवून टाकण्यात आले आहे. आमचे सर्व प्रश्न तसेच प्रलंबित आहेत. अशावेळी अन्यायाला वाचा फोडायला निवडणुकीसारखा दुसरा कोणता पर्याय आहे का? सुप्रिया सुळे जर प्रोफेशनल राजकारण करत असतील तर आम्हीही तसे करू, असेही हाके म्हणाले.
Source link
