मोर्शी तालुक्यातील खोपडा येथील खरेदी विक्री संघाचे संचालक नरेंद्र रामटेके यांनी सहकुटुंब बेमुदत उपोषणाचा इशारा दिल्यानंतर महसूल प्रशासनात खळबळ उडाली. त्यांच्या या आंदोलनाची दखल घेत तहसीलदार सागर ढवळे यांनी तात्काळ घटनास्थळाची पाहणी केली. या पाहणीनंतर पाणी प्रश्नावर तात्पुरता तोडगा निघाल्याने रामटेके यांनी आपले उपोषण तूर्त मागे घेतले आहे. रामटेके यांनी १६ जूनपासून उपोषणाचा इशारा दिला होता. खोपडा शेत शिवारातील पाणंद रस्त्यामधून एका शेतकऱ्याने नाली काढून सिमेंट पाईप टाकले होते. यामुळे रामटेके यांच्या शेतात पाणी शिरून लाखो रुपयांचे नुकसान होण्याची भीती होती. याच मुद्द्यावर त्यांनी आंदोलनाचा पवित्रा घेतला होता. काही काळापूर्वी महाराष्ट्र ग्रामीण रोजगार हमी योजनेअंतर्गत खोपडा ते लाडकी पाणंद रस्त्याचे काम सुरू होते. त्यावेळी रामटेके यांच्या शेजारील एका शेतकऱ्याने कोणतीही शासकीय परवानगी न घेता ठेकेदाराशी संगनमत करून शिवरस्त्यामधून ही नाली काढली होती. या नाल्यामुळे नरेंद्र रामटेके यांच्या शेतात पाणी शिरले होते. या समस्येबाबत रामटेके यांनी गतवर्षीच तहसीलदार यांच्याकडे तक्रार दिली होती. त्या अनुषंगाने शिरखेडचे मंडळ अधिकारी यांनी स्थळ निरीक्षण करून अहवाल सादर केला होता. या अहवालात शेजारील शेतकऱ्याने रस्त्याचे बेकायदेशीर खोदकाम करून व पाईप टाकून नरेंद्र रामटेके यांच्या शेतात पाणी सोडल्याचे स्पष्ट नमूद केले होते. अहवाल सादर होऊनही महसूल विभागाकडून कोणतीही कार्यवाही झाली नाही. त्यामुळेच रामटेके यांनी आपल्या मुलाबाळांसह उपोषणाचा मार्ग अवलंबला होता. अखेर, तहसीलदार सागर ढवळे यांनी संबंधित कंत्राटदाराला आदेश दिले. पायलीपासून खाली तीन फुटाची खणती करून दोन्ही बाजूला दोनशे फुटांपर्यंत नाली काढून जमा होणारे पाणी नाल्याच्या मार्गाने सोडण्यात यावे, असे निर्देश देण्यात आले. या आदेशानंतर रामटेके यांनी आपले उपोषण तात्पुरते स्थगित केले आहे.
Source link
