जुन्नर-आंबेगाव विभागाचे उपविभागीय अधिकारी (प्रांताधिकारी) गोविंद पंढरीनाथ शिंदे यांना दोन लाख रुपयांची लाच घेताना लाचलुचपत प्रतिबंधक विभागाने (एसीबी) शुक्रवारी मंचर येथे रंगेहाथ पकडले. एका बांधकाम व्यावसायिकाकडून इमारत पूर्णत्वाचे प्रमाणपत्र देण्यासाठी त्यांनी ही लाच मागितली होती. मिळालेल्या माहितीनुसार, प्रांताधिकारी शिंदे यांनी एका इमारतीचे बांधकाम पूर्ण झाल्याचे प्रमाणपत्र देण्यासाठी संबंधित बांधकाम व्यावसायिकाकडे तब्बल पाच लाख रुपयांची लाच मागितली होती. तडजोडीअंती दोन लाख रुपये देण्याचे ठरले होते. याबाबत ४८ वर्षीय तक्रारदार बांधकाम व्यावसायिकाने एसीबीकडे तक्रार दाखल केली होती. तक्रारदार हे एका भागीदारी फर्मचे भागीदार असून, त्यांच्या फर्मने पुणे-नाशिक महामार्गालगत नारायणगाव येथे एका प्लॉटवर इमारतीचे बांधकाम केले होते. इमारतीचे ९० टक्के काम पूर्ण झाल्यावर तक्रारदारांनी अंशतः पूर्णत्वाच्या प्रमाणपत्रासाठी उपविभागीय अधिकाऱ्यांकडे अर्ज केला होता. हा प्रस्ताव नगररचना विभागाकडे पाठवून ना हरकत प्रमाणपत्र प्राप्त केल्यानंतर प्रांताधिकारी शिंदे यांनी तो स्वतःकडे राखून ठेवला होता. तक्रारदार चौकशीसाठी गेले असता, शिंदे यांनी अंशतः पूर्णत्वाचे प्रमाणपत्र देण्यासाठी पाच लाख रुपयांची मागणी केली. त्यानंतर एसीबीने मंचर येथे सापळा रचला आणि गोविंद शिंदे यांना दोन लाख रुपये स्वीकारताना रंगेहाथ पकडले. याप्रकरणी मंचर पोलीस ठाण्यात प्रांताधिकारी गोविंद शिंदे यांच्या विरोधात भ्रष्टाचार प्रतिबंधक अधिनियम कलमानुसार गुन्हा दाखल करण्यात आला आहे. पोलीस अधीक्षक शिरीष सरदेशपांडे यांनी ही माहिती दिली.
Source link
