पाकिस्तानसोबत कोणतीही आंतरराष्ट्रीय क्रीडा स्पर्धा खेळण्यास आमचा आक्षेप नाही. मग ते क्रिकेट असो, हॉकी असो किंवा इतर कोणताही खेळ असो, असे मोठे वक्तव्य केंद्रीय क्रीडामंत्री मनसुख मांडविया यांनी केले. पण दहशतवादाला आश्रय देणाऱ्या पाकसोबत कोणत्याही द्विपक्षीय क्रीडा स्पर्धेत भाग घेणार नाही, या भूमिकेवर भारत ठाम आहे.

मांडविया म्हणाले की, पाकच्या हॉकी फेडरेशनने भारतात होणाऱ्या दोन स्पर्धांमध्ये सहभागासाठी त्यांच्या सरकारकडे परवानगी मागितली आहे. आम्ही त्यांना आशिया कप व ज्युनियर वर्ल्ड कप हॉकी स्पर्धेसाठी व्हिसा देऊ, परंतु संघ पाठवायचा की नाही हे त्यांच्या सरकारवर अवलंबून आहे. आशिया कप २७ ऑगस्ट ते ७ सप्टेंबर दरम्यान बिहारमधील राजगीर येथे प्रस्तावित आहे.

संसदेत क्रीडा प्रशासन विधेयक मांडणार

क्रीडामंत्री म्हणाले, २१ जुलैपासून सुरू होणाऱ्या संसदेच्या पावसाळी अधिवेशनात राष्ट्रीय क्रीडा प्रशासन विधेयक मांडले जाईल. त्यानुसार, एक नियामक मंडळ स्थापन होईल. ज्याला राष्ट्रीय क्रीडा महासंघांना (NSF) मान्यता देण्याचा व निधी देण्याचा अधिकार असेल. क्रीडा महासंघ सर्वोच्च प्रशासकीय, आर्थिक व नैतिक मानकांचे पालन करतील याचीदेखील हे मंडळ खात्री करेल.