हिंगोली जिल्ह्यात अवैध वाळू वाहतूक करणाऱ्या वाहनांवरील तीन वेगवेगळ्या कारवाईमध्ये तीन वाहनांसह ३५.८५ लाख रुपयांचा मुद्देमाल जप्त करण्यात आला आहे. या प्रकरणी पाच जणांवर रविवारी ता. १५ पोलिस ठाण्यांमध्ये गुन्हा दाखल झाला आहे. हिंगोली जिल्ह्यात अवैध वाळू उपसा करून वाहतूक करणाऱ्या वाहनांवर कारवाईची मोहिम हाती घेण्यात आली आहे. त्यासाठी पोलिस अधिक्षक निलाभ रोहन, अप्पर पोलिस अधिक्षक कमलेश मीना, गुन्हे शाखेचे निरीक्षक मोहन भोसले यांच्या मार्गदर्शनाखाली पथके स्थापन करण्यात आली आहेत. गुन्हे शाखेसोबतच स्थानिक पोलिस ठाण्यांची पथकेही कार्यरत आहेत. दरम्यान, रविवारी ता. १५ पहाटेच्या सुमारास औंढा नागनाथ तालुक्यातील देवाळा फाटा येथे एक हायवा मधून वाळू वाहतूक होत असल्याची माहिती पोलिसांना मिळाली होती. त्यावरून जमादार संदीप पवार, सुमीत टाले, सतीष नरवाडे, विनोद कुटे यांच्या पथकाने तातडीने देवाळा येथे जाऊन एक हायवा पकडला. त्यानंतरच जवळा बाजार भागातील नालेगाव परिसरातून एक टॅॅक्टर पकडण्यात आले. पोलिसांनी दोन्ही वाहने जप्त केली असून या प्रकरणी चौघांवर औंढा नागनाथ पोलिस ठाण्यात गुन्हा दाखल झाला आहे. दरम्यान, वसमत तालुक्यातील पळसगाव पाटी येथे नांदेडकडून एका हायवामध्ये वाळूची वाहतूक होत असल्याची माहिती वसमत ग्रामीण पोलिसांना मिळाली होती. त्यावरून सहाय्यक पोलिस निरीक्षक गजानन बोराटे, जमादार विजय उपरे, नामदेव बेंगाळ, शहाजी बामणीकर यांच्या पथकाने पळसगाव पाटी येथे जाऊन वाहनांची तपासणी केली. यामध्ये हायवा व वाळू जप्त करण्यात आली आहे. या प्रकरणी वसमत ग्रामीण पोलिस ठाण्यात गुन्हा दाखल झाला आहे. या तीन प्रकरणात पोलिसांनी ३५.८५ लाख रुपयांचा मुद्देमाल जप्त केला आहे. तर दत्ता कुटे (रा. चिमेगाव, ता. औंढा), सुनील सांगळे, अरबाज खान पठाण (रा. नालेगाव), राजू भंडारी (रा. नांदेड) यांच्यासह अन्य एकावर गुन्हा दाखल झाला आहे.
Source link
