सेनगाव पोलिस ठाण्याच्या हद्दीतील हत्ता शिवारात साध्या वेशात गेलेल्या पोलिसांच्या पथकाने सोमवारी ता. १ जुगार अड्यावर छापा टाकून ५४ हजाराचा मुद्देमाल जप्त केला आहे. या प्रकरणी सहा जणांवर सेनगाव पोलिस ठाण्यात गुुन्हा दाखल झाला आहे. हिंगोली जिल्ह्यात अवैध व्यवसायाला आळा घालण्यासाठी पोलिसांनी विशेष पथके स्थापन केली आहेत. पोलिस अधिक्षक निलाभ रोहन, अप्पर पोलिस अधिक्षक कमलेश मीना, गुन्हे शाखेचे निरीक्षक मोहन भोसले यांनी स्थापन केलेल्या पथकाकडून दररोज कारवाईची माहिती घेतली जात आहे. या शिवाय उपाधिक्षक मयूर रसाळ यांचे स्वतंत्र पथक स्थापन करण्यात आले असून या पथकाकडून अवैध व्यवसायावर कारवाईची मोहिम सुरु आहे. दरम्यान, सेनगाव पोलिस ठाण्याच्या हद्दीत हत्ता शिवारातील एका शेतात जुगार अड्डा सुरु असल्याची माहिती पोलिसांना मिळाली होती. त्यावरून पोलिस उपाधिक्षक मयूर रसाळ, गुन्हे शाखेचे निरीक्षक मोहन भोसले, सहाय्यक पोलिस निरीक्षक शिवसांब घेवारे, जमादार संदीप जाधव, भुजंग कोकरे, किशोर सावंत, हरिभाऊ गुंजकर, साईनाथ कंठे यांच्या पथकाने साध्या वेशात जाऊन छापा टाकला. यामध्ये घटनास्थळी पुंजाजी गडदे( रा. हत्ता पाटी), ज्ञानबा पादरे (रा. हत्ता), अनिल साळवे (रा. साखरा), रवी चव्हाण (रा. पाटोदा), भाऊराव पवार (रा. भानखेडा) यांच्यासह अन्य एक जण जुगार खेळतांना आढळून आले. पोलिसांनी घटनास्थळावरून जुगाराच्या साहित्यासह ५४ हजाराचा मुद्देमाल जप्त केला आहे. या प्रकरणी सेनगाव पोलिस ठाण्यात गुन्हा दाखल झाला आहे.
Source link
