राष्ट्रवादी काँग्रेस पक्षाच्या राष्ट्रीय कार्यकारिणीच्या बैठकीत माजी मंत्री आणि आमदार धनंजय मुंडे यांनी शरदचंद्र पवार गटाचे आमदार रोहित पवार यांच्यावर नाव न घेता टीका केली. मुंबईतील वरळी येथील डोममधील सभागृहात ही बैठक पार पडली. राज्यभर आणि देशभरातील प्रमुख पदाधिकारी या बैठकीसाठी उपस्थित होते. याच बैठकीत उपमुख्यमंत्री सुनेत्रा पवार यांची पक्षाच्या राष्ट्रीय अध्यक्षपदी निवड जाहीर करण्यात आली. या कार्यक्रमाला प्रफुल पटेल, सुनील तटकरे, छगन भुजबळ, दिलीप वळसे पाटील, हसन मुश्रीफ आणि नरहरी झिरवाळ यांसारखे नेते उपस्थित होते. या पार्श्वभूमीवर बोलताना धनंजय मुंडे यांनी काही नेत्यांवर अप्रत्यक्ष टीका करत पक्षातील अलीकडच्या घडामोडींवर भाष्य केले. धनंजय मुंडे म्हणाले की, दादांच्या अकाली निधनानंतर पक्षातील सर्वांनी एकमताने निर्णय घेतला की सुनेत्रा पवार यांच्यावर राष्ट्रीय अध्यक्षपदाची जबाबदारी सोपवावी. त्या वेळी सर्वांनी एकत्र येत निर्णय घेतला होता, असे त्यांनी स्पष्ट केले. माझी मध्यंतरी वाचा गेली होती. ती कायमची गेली असती तर बरे झाले असते, असे वाटण्याची वेळ माझ्यावर आली आहे, असे भावनिक विधान करत त्यांनी दुःख व्यक्त केले. आपल्या तोंडून दादांबद्दल शोक व्यक्त करण्याची वेळ येऊ नये, अशी भावना त्यांनी मांडली. महाराष्ट्राच्या विकासाची धुरा सुनेत्राताई सक्षमपणे सांभाळतील, असा विश्वास त्यांनी व्यक्त केला. मात्र, काही जणांकडून शपथविधीबाबत घाई केल्याचा आरोप केला जात असल्याने त्यांनी त्यावरही तीव्र प्रतिक्रिया दिली. वहिणींना शपथविधीची घाई झाली होती, आम्ही दबाव टाकला, असे म्हणणाऱ्यांना माझा प्रश्न आहे, असे म्हणत मुंडेंनी हल्ला चढवला. त्यांनी थेट विचारले की, अजित दादांना अग्नी द्यायच्या आधी तुम्ही विलिनीकरणाची भाषा बोलत होतात, ते काय होते? या विधानाने सभागृहात एकच खळबळ उडाली. पुढे त्यांनी असेही म्हटले की, ज्यावेळी सुनेत्रा पवार उपमुख्यमंत्री झाल्या, तेव्हा तुम्हाला साध्या शुभेच्छाही देता आल्या नाहीत का? एक साधा संदेश जरी दिला असता, तरी तो सन्मानाचा भाग ठरला असता, असे ते म्हणाले. महाराष्ट्राच्या मायबाप जनतेला काही कळत नाही का? असा सवाल करत त्यांनी उपस्थितांना विचार करायला भाग पाडले. त्यांच्या या वक्तव्यामुळे रोहित पवार यांच्यावर अप्रत्यक्ष निशाणा साधला असल्याचे स्पष्ट झाले. धनंजय मुंडे पुढे म्हणाले की, सुनेत्रा पवार यांना राष्ट्रीय अध्यक्ष करण्याचा निर्णय आधीच जाहीर करण्यात आला होता. त्यानंतर काही घटनांवरून अनावश्यक वाद निर्माण करण्यात आले, असा त्यांचा आरोप होता. काल तक्रार नोंदवली नाही म्हणून एक प्रकारचा देखावा केला गेला. आज बारामतीत तक्रारीसाठी पुन्हा देखावा केला, असे ते म्हणाले. हे सर्व प्रकार केवळ आमच्या बातम्या दाबण्यासाठी आणि लक्ष विचलित करण्यासाठी होत असल्याचा आरोप त्यांनी केला. त्यांच्या मते, अशा हालचालींमुळे पक्षातील वातावरण दूषित होत आहे. माझ्यासारख्या कार्यकर्त्याला हे सगळे अत्यंत किळसवाणे वाटते, असे स्पष्ट शब्दांत त्यांनी सांगितले. धनंजय मुंडे यांच्या भाषणामुळे राजकीय वातावरण तापले या बैठकीत सुनेत्रा पवार यांच्या निवडीमुळे पक्षात नवे नेतृत्व पुढे आले असल्याचा संदेश देण्यात आला. मात्र, या निमित्ताने सुरू झालेली टीका आणि आरोपांमुळे राष्ट्रवादी काँग्रेसमध्ये अंतर्गत मतभेद उघडपणे समोर आले आहेत. एकीकडे राष्ट्रीय अध्यक्षपदाची जबाबदारी स्वीकारणाऱ्या सुनेत्रा पवार यांच्यावर विश्वास व्यक्त केला जात असताना, दुसरीकडे काही नेत्यांच्या भूमिकांवर प्रश्नचिन्ह उपस्थित केले जात आहे. त्यामुळे आगामी काळात पक्षातील राजकीय समीकरणे कशी बदलतील, याकडे सर्वांचे लक्ष लागले आहे. धनंजय मुंडे यांच्या भाषणामुळे राजकीय वातावरण आणखी तापले असून, या वक्तव्याचे पडसाद राज्याच्या राजकारणात उमटण्याची शक्यता व्यक्त केली जात आहे.
Source link
