नाशिकमधील स्वयंघोषित भोंदू गुरु अशोक खरात याच्या काळ्या कृत्यांचा आणि लैंगिक अत्याचाराचा पर्दाफाश करणारा ‘महाराष्ट्र एपस्टीन फाईल्स’ हा चित्रपट लवकरच प्रेक्षकांच्या भेटीला येत आहे. मात्र, या चित्रपटात महत्त्वाची भूमिका साकारणाऱ्या प्रसिद्ध अभिनेत्री आणि शिवसेना नेत्या दीपाली सय्यद यांनी आपल्याला फोनवरून धमक्या येत असल्याचा खळबळजनक आरोप केला आहे. “हा चित्रपट करू नका, अन्यथा तुमचे राजकीय करिअर उद्ध्वस्त करू,” अशा धमक्या काही महिला नेत्यांकडून दिल्या जात असल्याचे त्यांनी म्हटले आहे. तर शिवसेना चित्रपट सेनेचे अध्यक्ष, सुशांत शेलार यांनी दीपाली सय्यद यांना पाठिंबा दिला आहे. अवघ्या महाराष्ट्रात खळबळ माजवणाऱ्या भोंदू अशोक खरात व त्याच्या कारनाम्यांवर येणाऱ्या चित्रपटात सत्ताधारी शिवसेनेच्या पदाधिकारी दीपाली सय्यद प्रमुख भूमिकेत दिसून येणार आहेत. दीपाली सय्यद प्रस्तुत चित्रपटात रुपाली चाकणकर यांच्या भूमिकेत दिसणार असल्याची चर्चा आहे. दिग्दर्शक स्वरूप बी सावंत यांचा हा चित्रपट २ ऑक्टोबर रोजी प्रदर्शित होणार असून, पुढील महिन्यापासून चित्रीकरणाला सुरुवात होणार आहे. दरम्यान, या चित्रपटात भूमिका साकारण्यावरून आपल्याला धमक्या येत असल्याचा दावा दिपाली सय्यद यांनी केला आहे. नेमके काय म्हणाल्या दिपाली सय्यद? दीपाली सय्यद यांनी माध्यमांशी बोलताना सांगितले की, खरात प्रकरणातील महिला नेत्याची (रूपाली चाकणकर) भूमिका साकारू नका, यासाठी त्यांच्यावर राजकीय दबाव आणला जात आहे. “तुमचे राजकीय करिअर उद्ध्वस्त केले जाईल, असे धमकावणारे फोन काही महिला नेत्यांकडून आले आहेत,” असे त्यांनी उघड केले. यावर आपली भूमिका स्पष्ट करताना दीपाली सय्यद म्हणाल्या, “मी एक कलाकार आहे आणि कोणाची परवानगी घेऊन काम करत नाही. मला स्क्रिप्ट मिळाली असून, चार महिने ‘बिग बॉस’मध्ये असल्यामुळे मला या प्रकरणाची सविस्तर माहिती नव्हती, पण आता सत्य समोर आले आहे. कर नाही त्याला डर कशाचा? मी या दबावाला घाबरत नाही आणि हे प्रकरण पक्षश्रेष्ठी एकनाथ शिंदे व श्रीकांत शिंदे यांच्या कानावर घालणार आहे”. शिवसेना चित्रपट सेना दीपाली सय्यद यांच्या पाठीशी दीपाली सय्यद यांच्यावर होणाऱ्या या दबावाचा शिवसेना चित्रपट सेनेचे अध्यक्ष सुशांत शेलार यांनी तीव्र निषेध केला आहे. सुशांत शेलार म्हणाले की, “दीपाली ताई उत्तम अभिनेत्री आहेत आणि त्यांना अभिव्यक्ती स्वातंत्र्य आहे. कोणती भूमिका करायची हे त्यांनीच ठरवायचे आहे. अशा धमक्यांना त्यांनी भीक घालू नये, शिवसेना चित्रपट सेना त्यांच्या पाठीशी खंबीरपणे उभी आहे”. विरोधकांनी ‘२० पैसे पर कमेंट’ देऊन ट्रोलर्स बसवले असल्याचा टोलाही त्यांनी यावेळी लगावला. आता सगळं उघड होणार…! दरम्यान, या चित्रपटाची ‘आता सगळं उघड होणार…!’ ही टॅगलाईन सध्या चर्चेचा विषय ठरली आहे. सदर चित्रपटात अशोक खरातच्या ढोंगीपणासह या प्रकरणाशी संबंधित महाराष्ट्राच्या राजकारणातील काही प्रभावशाली व्यक्तींचे वास्तवही उलगडण्याचा प्रयत्न केला जाणार आहे. त्यामुळे हा चित्रपट केवळ एका व्यक्तीच्या कथित कृष्णकृत्यापुरता मर्यादित न राहता सामाजिक व राजकीय पैलूंवर प्रकाश टाकणारा असल्याचीही चर्चा आहे.
Source link
