भाजप केरलम विधानसभा निवडणुकीत लेफ्टच्या (डावे) मतपेढीला त्याच धर्तीवर आपल्याकडे खेचण्याचा प्रयत्न करेल, जे कधीकाळी ममता बॅनर्जी यांनी पश्चिम बंगालमध्ये केले होते. ममतांनी तेव्हा डाव्यांवर बहुसंख्याक कॅडर्सचे हक्क अल्पसंख्याक कॅडर्सच्या स्वाधीन केल्याचा आरोप आकडेवारीच्या आधारावर केला होता. केरळमध्ये भाजपाने हीच रणनीती स्वीकारली असून, डावे समर्थक मानल्या जाणाऱ्या नायर आणि एझवा मतदारांमध्ये बहुसंख्याक विरुद्ध अल्पसंख्याक असा नॅरेटिव्ह (प्रवाद) आपल्या स्थानिक सहकाऱ्यांच्या माध्यमातून तयार करण्यास सुरुवात केली आहे.

राज्याचे नाव केरळवरून बदलून ‘केरलम’ करण्याची घोषणा करून भाजप पुढे सरकला आहे. भाजपाचे राष्ट्रीय अध्यक्ष नितीन नवीन यांनी पक्षाचे वरिष्ठ सरचिटणीस विनोद तावडे यांची केरलमचे निवडणूक प्रभारी म्हणून नियुक्ती करताना याच नॅरेटिव्हच्या भोवती निवडणूक मोहीम आखण्याचा फॉर्म्युला दिला. तावडे यांनी म्हटले आहे की, भाजपा मित्रपक्षांसह केरळमध्ये ऐतिहासिक कामगिरी करेल. भाजपाच्या केरलम युनिटचे अध्यक्ष राजीव चंद्रशेखर यांचे म्हणणे आहे की, राज्यात ‘भारतीय धर्म जन सेना’ त्यांचा मित्रपक्ष आहे. यासोबतच ‘नायर सर्व्हिस सोसायटी’ व ‘श्री नारायण धर्म परिपालन’ हिंदू एकतेची भाषा करत आहेत. यात ख्रिश्चन समुदायालाही समाविष्ट करून घेण्याची वकिली या संघटना व भाजपाकडून केली जात आहे.

ममतांचे मॉडेल: ३४ वर्षांचा डाव्यांचा बालेकिल्ला पाडला

पश्चिम बंगालमध्ये मागास आणि पुढारलेल्या जाती लेफ्टचे मोठे कॅडर मानल्या जायच्या. ममतांनी बहुसंख्याक अवहेलनेच्या नॅरेटिव्हने या कॅडरला खिंडार पाडले होते. त्यांनी ‘कट मनी’ आणि सिंडिकेट (आर्थिक व सामाजिक हिस्सेदारी) मध्ये बहुसंख्याक समाजाच्या उपेक्षेचा आकडेवारीच्या आधारावर प्रचार केला. याचा परिणाम असा झाला की, लेफ्टच्या कॅडरचा मोठा हिस्सा टीएमसीसोबत गेला.