टेनिस कोर्टवर आपल्या किंकाळ्या आणि प्रतिस्पर्ध्याला भेदणाऱ्या बेसलाइन शॉट्ससाठी प्रसिद्ध असलेली वर्ल्ड नंबर-1 आर्यना सबालेंका सध्या एका वेगळ्याच अवतारात दिसत आहे. अलीकडेच ‘एस्क्वायर’ मासिकाची कव्हर स्टार बनलेल्या बेलारूसच्या सबालेंकाने अत्यंत ग्लॅमरस फोटोशूट केले आहे. निळ्या रंगाच्या भव्य फर कोट आणि हाय हील्समधील तिचे फोटो खूप व्हायरल होत आहेत.

यावेळी दिलेल्या मुलाखतीत 27 वर्षीय सबालेंकाने स्वतःला दुहेरी व्यक्तिमत्त्वाची व्यक्ती असल्याचे सांगितले. ती म्हणाली, ‘कोर्टवर मी खूप आक्रमक आणि भावूक असते. ही माझ्या खेळाची गरज आहे, पण कोर्टबाहेर मी पूर्णपणे वेगळी व्यक्ती आहे, जी शांत आहे, जिला मिठी मारणे आवडते आणि जी शांततेच्या शोधात आहे.’

जेव्हा तिला विचारण्यात आले की, जर ती टेनिस खेळाडू नसती तर काय केले असते? यावर सबालेंका म्हणाली, ‘कदाचित बॉक्सिंग किंवा मग मॉडेलिंग. कदाचित प्लस-साईज मॉडेल! मी त्यात खूप चांगली ठरले असते. मला माझी आक्रमकता बाहेर काढण्यासाठी आयुष्याच्या शेवटपर्यंत असे काहीतरी करावे लागेल ज्यात खूप ऊर्जा लागेल.’

लढाऊ वृत्ती वडिलांकडून मिळालेली देणगी

सबालेंकाच्या या झुंजार वृत्तीमागे तिचे वडील सर्गेई यांचा हात आहे, जे स्वतः एक व्यावसायिक हॉकी खेळाडू होते. २०१ ९ मध्ये वयाच्या अवघ्या ४३ व्या वर्षी मेनिन्जायटिसमुळे त्यांचे अचानक निधन झाले. सबालेंका म्हणाली, ‘माझ्या वडिलांनी मला शिकवले की काहीही झाले तरी मजबूत राहायचे, सकारात्मक राहायचे आणि आयुष्यात मजा करणे सोडून द्यायचे नाही. जेव्हा मी त्यांना गमावले, तेव्हा टेनिसनेच मला वाचवले. जर टेनिस नसते, तर आज मी कुठे असते हे माहित नाही.’

रडणे-भावनांना वाट मोकळी करून देणे महत्त्वाचे

सबालेंकाच्या मते, दुःखातून बाहेर पडण्याचा सर्वोत्तम मार्ग म्हणजे स्वतःला कामात झोकून देणे, पण त्याचबरोबर रडणे आणि आपल्या भावनांना वाट मोकळी करून देणे देखील महत्त्वाचे आहे. मुलाखतीत सबालेंकाने २०२२ च्या त्या काळाचाही उल्लेख केला, जेव्हा ती सर्व्हिस करणे विसरली होती. तिने याला एक वाईट स्वप्न म्हटले.

तिने सांगितले, ‘कल्पना करा, तुम्ही आयुष्यभर एकच काम करत आहात आणि अचानक एक दिवस तुम्हाला चेंडू नीट फेकताही येत नाहीये. तो काळ इतका कठीण होता की मी हार मानणार होते. पण त्या टप्प्याने मला इतके मजबूत केले की आता मला विश्वास आहे की जरी माझी सर्व्हिस खराब झाली तरी, तरीही मी सामना जिंकू शकते.’