शोएब अख्तरवर भारत सरकारच्या निर्णयाचा परिणामः भारत सरकारने पहलगाममध्ये 22 एप्रिल रोजी झालेल्या दहशतवादी हल्ल्यानंतर पाकिस्तानाविरोधात काही कठोर निर्णय घेतले आहेत. पाणीबंदीपासून ते युट्यूब चॅनेल्सवर बंदी घालण्यापर्यंतचे अनेक निर्णय भारत सरकारने घेतले आहेत. एकीकडे या निर्णयाचा सर्वसामान्य पाकिस्तानी लोकांना फटका बसत असतानाच भारताच्या कठोर भूमिकेचा फटका पाकिस्तानमधील अनेक माजी क्रिकेटपटूंबरोबरच युट्यूबर्सलाही बसला आहे. पाकिस्तानमधून चालणाऱ्या अनेक युट्यूब चॅनेल्सवर भारतात बंदी घातल्यानंतर याचा मोठा आर्थिक फटका या युट्यूबर्सबरोबरच पाकिस्तानच्या माजी क्रिकेटपटूंनाही बसतोय. याबद्दल त्यांनी नाराजी व्यक्त केली आहे.
कमाईला बसला मोठा फटका
भारताने बंदीची कारवाई केलेल्या युट्यूब चॅनेल्समध्ये माजी वेगवान गोलंदाज शोएब अख्तरबरोबरच प्रसिद्ध कंटेंट क्रिएटर वासे हबीबचाही समावेश आहे. या दोन्ही खात्यांवरुन खोचक पद्धतीने क्रिकेटसंदर्भातील विश्लेषण केलं जातं. या दोन्ही चॅनेल्सचा मोठा चाहता वर्ग क्रिकेटवेड्या भारतात आहे. मात्र अचानक भारत सरकारने या चॅनेल्सवर भारतात बंदी घातल्याने युट्यूबच्या माध्यमातून होणाऱ्या मोठ्या कमाईला या कंटेट क्रिएटर्सला मुकावं लागत आहे. दोन्ही देशांमधील ताणाव वाढल्याची झळ शोएब अख्तरबरोबरच अनेक पाकिस्तानी कंटेट क्रिएटर्सला बसत आहे.
स्वत: शोएब अख्तरने व्यक्त केली चिंता
“आमच्या चॅनेलला मिळणाऱ्या व्हूअरशीपपैकी मोठा वाटा हा भारतीयांचा आहे. भारतातून आम्हाला फार मोठ्या प्रमाणात व्ह्यूज मिळतात. पाकिस्तानातून चालणारी युट्यूब चॅनेल्स मोठ्या प्रमाणात भारतीय प्रेक्षकांवर अवलंबून असतात हे नाकारता येणार नाही. या बंदीचा अनेक युट्यूबर्सला मोठा फटका बसणार आहे. हा फटका आर्थिक आणि व्ह्यूजच्या हिशोबानेही बसणार आहे,” असं शोएब अख्तरने आयएएनएस या वृत्तसंस्थेशी संवाद साधताना नमूद केलं.
शोएबचं अकाऊंट प्रचंड लोकप्रिय झालं
पाकिस्तानमधील अनेक माजी क्रिकेटपटूंनी कॉमेंट्री आणि वृत्तवाहिन्यांवर तज्ञ म्हणून सहभागी होत प्रचंड लोकप्रियता मिळवली. मात्र शोएब अख्तरने युट्यूबवरुनही बरीच लोकप्रियता मिळवली. युट्यूबवरुन अल्पावधीत लोकप्रिय झालेल्या नावाजलेल्या नावांमध्ये शोएब अख्तरचा समावेश होतो. 2019 च्या वर्ल्ड कपदरम्यान शोएबचं युट्यूब चॅनेल प्रचंड लोकप्रिय झालं. शोएब अख्तरने अनेकदा भारतीय संघाच्या कामगिरीचं विश्लेषण करुन भारतीय चाहत्यांची मनं जिंकत व्ह्यूज मिळवले. अनेकदा शोएब अख्तरने भारतातील सर्वात लोकप्रिय क्रिकेटपटू असलेल्या विराट कोहली आणि रोहित शर्मासारख्या खेळाडूंचं उघडपणे कौतुक केल्याचं या व्हिडीओंमधून पाहायला मिळालं. शोएब पाठोपाठ रमीज राजा आणि इंझमाम-उल-हक यांनीही सोशल मीडियाचा कल पाहून भारताचं कौतुक करत या वाहत्या गंगेत हात धुवून घेण्याचा प्रयत्न केला.
जाहिरातीही मिळत नाहीत
“जे क्रिएटर्स युट्यूबवरील मॉनेटायझेशनवर अवलंबून आहेत त्यांच्यासाठी भारतीय व्ह्यूअरशीपला फटका बसणे म्हणजे जाहिरातींच्या माध्यमातून मिळणाऱ्या कमाईला ब्रेक लागण्यासारखं आहे,” असं लाहोरमधील एका मिडिया स्ट्रॅटर्जिस्टने ‘आयएएनएस’शी संवाद साधताना म्हटलं.
बंदी घातलेल्या 16 युट्यूब चॅनेल्समध्ये यांचाही समावेश
भारताने प्रसिद्ध पाकिस्तानी कंटेट क्रिएटर्सबरोबरच पाकिस्तानमधील वृत्त वाहिन्यांची युट्यूब चॅनेल्सही बंद केली आहेत. यामध्ये जीओ न्यूज, समा न्यूज यासारख्या वृत्तवाहिन्यांचा समावेश आहे. या वहिन्या खोटी माहिती पसरवत असल्याने राष्ट्र हित्याच्या दृष्टीने आणि खोट्या माहितीचा प्रसार थांबवण्यासाठी त्यांच्यावर बंदी घालण्यात आली आहे. भारताने पाकिस्तानमधील एकूण 16 युट्यूब चॅनेल्सवर बंदी घातली आहे.
