पुणे (कोथरूड) : पुणे महानगरपालिका निवडणुकांची चाहूल लागत असतानाच शहर भाजपमध्ये राजकीय हालचालींना वेग आला आहे. भाजपने आगामी निवडणुकांच्या पार्श्वभूमीवर कोथरूडमध्ये रणनीती आखण्यास सुरुवात केली असून, भाजपचे शहर चिटणीस लहु बालवडकर यांच्यावर कोथरूड उत्तर मंडल अध्यक्षपदाची जबाबदारी सोपवण्यात आली आहे.
बालवडकर हे भाजपमधील एक निष्ठावंत आणि अनुभवी कार्यकर्ते म्हणून ओळखले जातात. कॅबिनेट मंत्री चंद्रकांतदादा पाटील आणि केंद्रीय राज्यमंत्री मुरलीधर मोहोळ यांचे ते खंदे समर्थक मानले जातात. त्यामुळेच त्यांच्याकडे ही मोठी जबाबदारी दिली गेल्याचे बोलले जात आहे.
लोकसभा निवडणुकीदरम्यान बालवडकर यांनी बालेवाडी, औंध, बाणेर, सोमेश्वरवाडी, सुतारवाडी, पाषाण या भागांत भाजपसाठी दमदार कामगिरी केली. त्यांच्या प्रयत्नांतून मोहोळ यांना तब्बल २२,६३४ मतांची आघाडी मिळाली. त्याचप्रमाणे, विधानसभेतही त्यांनी कोथरूडमध्ये चंद्रकांत पाटील यांना ३०,३४९ मतांनी आघाडी मिळवून दिली होती.
या विजयांमागे बालवडकर यांचा मोठा वाटा राहिल्यानेच त्यांना आता कोथरूड उत्तर मंडल अध्यक्षपद देऊन भाजपने त्यांच्यावर विश्वास दाखवला आहे.
भाजप सध्या प्रत्येक मतदारसंघात स्वतंत्र रणनीती आखत असून, स्थानिक पातळीवर मजबूत संघटन रचना उभारण्यावर भर देत आहे. कोथरूड उत्तर मंडल अध्यक्षपदासाठी बालवडकर यांची निवड ही त्याचाच एक भाग असल्याचे सांगितले जात आहे.
बालवडकर गेल्या काही वर्षांपासून प्रभाग क्र. ९ मध्ये सामाजिक उपक्रम आणि जनसंपर्काच्या माध्यमातून आपली वेगळी छाप पाडत आहेत. त्यांच्या नेतृत्वाखाली कोथरूडमध्ये भाजपची ताकद अधिक बळकट होणार असल्याचे पक्षातील स्थानिक कार्यकर्त्यांचे म्हणणे आहे.
