नऱ्हे पोलिस ठाण्याच्या हद्दीत घडलेल्या सुमारे एक कोटी रुपयांच्या कथित दरोडा प्रकरणात पोलिसांनी आशिष सुबालाल तिवारी याला अटक केली आहे. तिवारी हा पत्रकार असल्याचे भासवत असल्याचा पोलिसांचा आरोप आहे. या प्रकरणात राजगड पोलिस ठाण्यांतर्गत खेड-शिवापूर पोलिस चौकीत कार्यरत असलेल्या पोलिस कर्मचारी प्रमिला निकम आणि अजिज मेस्त्री यांच्याविरुद्धही गुन्हा दाखल करण्यात आला आहे. दोन्ही कर्मचारी सध्या फरार असल्याची प्राथमिक माहिती आहे. उपलब्ध माहितीनुसार, मोठ्या रकमेच्या या प्रकरणाचा तपास करताना पोलिसांना तिवारीसह संबंधित पोलिस कर्मचाऱ्यांचा कथित सहभाग असल्याचे काही पुरावे मिळाले. त्यानंतर नऱ्हे पोलिसांनी तिवारीला ताब्यात घेऊन त्याची चौकशी केली. चौकशीनंतर त्याला अटक करण्यात आली. गुन्हा दाखल झाल्याची माहिती मिळताच प्रमिला निकम आणि अजिज मेस्त्री हे पसार झाले आहे. त्यांचा शोध घेण्यासाठी पोलिसांची स्वतंत्र पथके रवाना करण्यात आली असून, त्यांच्या संभाव्य ठिकाणांची माहिती घेतली जात आहे. दोन्ही कर्मचाऱ्यांचे मोबाइल कॉल रेकॉर्ड, आर्थिक व्यवहार आणि आरोपींशी असलेल्या संपर्काची तपासणी होण्याची शक्यता आहे. दरोड्यातील एक कोटी रुपयांची रक्कम नेमकी कोणाची होती, घटना कधी व कुठे घडली, आरोपींनी कोणती कार्यपद्धती वापरली आणि या प्रकरणात आणखी किती व्यक्ती सहभागी आहेत, याचा तपास नऱ्हे पोलिस करीत आहेत. या प्रकरणामुळे पोलिस दलात खळबळ उडाली आहे.
Source link
