उच्च शिक्षण घेऊन उज्ज्वल भविष्य घडवण्याऐवजी झटपट श्रीमंत होण्याच्या हव्यासापोटी अमली पदार्थांच्या विळख्यात अडकलेल्या दोन तरुणांना गुन्हे शाखेने बेड्या ठोकल्या. शहरात विदेशी हायड्रो गांजाची विक्री करणाऱ्या राजवीर चरणसिंग बिराग (20, रा. सिडको एन-4) आणि ओम रवींद्र शिंदे (23, रा. एन-4, भगतसिंग कॉलनी) या दोघांकडून 29 लाख 51 हजार 200 रुपयांचा मुद्देमाल जप्त करण्यात आला आहे. अटक करण्यात आलेला ओम हा एमबीए पदवीधर आहे, तर राजवीर पुण्यात इंजिनिअरिंगच्या पहिल्या वर्षात शिक्षण घेत आहे. यातील एकाचे वडील वकील असून दुसरे शासकीय विभागात लिपिक आहेत. सुशिक्षित आणि मध्यमवर्गीय कुटुंबातील या तरुणांनी अमली पदार्थांच्या या काळ्याबाजारात पाऊल ठेवल्याने पोलिस दलासह शहरात खळबळ माजली आहे. निरीक्षक गजानन कल्याणकर यांच्या मार्गदर्शनाखाली पथकाने ही कारवाई केली असून आरोपींना 3 दिवसांची पोलिस कोठडी सुनावण्यात आली आहे. गांजा विक्रीसाठी स्नॅपचॅट मेसेजींग ॲपचा आधार तपासात धक्कादायक माहिती समोर आली आहे की, हे तरुण गांजा विक्रीसाठी स्नॅपचॅट या सोशल मीडिया ॲपचा वापर करत होते. या ॲपवर केलेले चॅटिंग आणि फोटो पाहिल्यानंतर आपोआप नष्ट होतात, ज्यामुळे पोलिसांना पुरावा सापडणार नाही, असा त्यांचा समज होता. स्नॅपचॅट स्टोरी आणि ग्रुप्सच्या माध्यमातून ते शहरातील हायप्रोफाइल तरुणांच्या संपर्कात होते. या गुन्ह्यात आठ जणांची टोळी सक्रिय असून उर्वरित फरार आरोपींचा शोध पोलिस घेत आहेत.
Source link
