छत्रपती संभाजीनगरचा लोकप्रिय रील स्टार अरुण तुपेचे आज सकाळी निधन झाले आहे. बालाजी नगर येथील त्याच्या घरी सकाळच्या सुमारास मृतावस्थेत आढळून आला. अरुणच्या अकाली निधनाने सोशल मीडियावर हळहळ व्यक्त केली जात आहे. मिळालेल्या माहितीनुसार, अरुण तुपे सकाळी त्याच्या कुटुंबीयांना अत्यंत गंभीर अवस्थेत आढळून आला. त्याला तातडीने जवळच्या खाजगी रुग्णालयात दाखल करण्यात आले. डॉक्टरांनी त्याला तपासून मृत घोषित केले. मात्र, अरुणचा मृत्यू कशामुळे झाला याचे कारण अद्याप समजू शकले नाही. इन्स्टाग्रामवर अरुण तुपेने मृत्यूच्या 22 तास आधीच एक रील शेअर केली होती. तसेच त्या रीलवरील कमेंट्सला तो रिप्लाय देखील देत होता. त्यामुळे अचानक असे काय घडले ज्यामुळे त्याचा मृत्यू झाला, हे कारण अद्याप समजू शकले नाहीये. संभाजीनगरच्या घाटी रुग्णालयात त्याच्या मृतदेहावर शवविच्छेदन करण्यात आले. त्यानंतर त्याच्या गावी त्याच्यावर अंत्यसंस्कार करण्यात आल्याची माहिती मिळाली आहे. अरुण तुपेने सोशल मीडियावर आपल्या अभिनयाने वेगळी ओळख निर्माण केली होती. त्याचे व्हिडिओ कॉमेडी असायचे. त्याचा स्वभाव देखील नेहमीच हसता-खेळता असायचा. त्याच्या मनमिळाऊ स्वभावामुळे त्याचा मित्र परिवार देखील मोठा होता. त्याच्या अकाली निधनाने मित्र परिवारावरही शोककळा पसरली आहे.
Source link
