नवनिर्वाचित महापौर आणि उपमहापौरांच्या निवडीनंतर मालेगाव महानगरपालिकेची आज, १८ फेब्रुवारी रोजी झालेली पहिलीच महासभा प्रचंड गदारोळात पार पडली. टिपू सुलतान यांच्या फोटोंचा वाद, काँग्रेस प्रदेशाध्यक्ष सपकाळ यांनी छत्रपती शिवरायांची टिपू सुलतानसोबत केलेली तुलना आणि ३ हजार ४५ बनावट जन्म दाखल्यांचे प्रकरण यांमुळे महासभेच्या सुरुवातीलाच सत्ताधारी आणि विरोधकांमध्ये जोरदार खडाजंगी पाहायला मिळाली. महासभा सुरू होण्यापूर्वीच शिवसेनेच्या वतीने सर्व महापुरुषांचे फोटो महापौर शेख नसरीन बानो आणि उपमहापौर शान-ए-हिंद यांना भेट देण्यात आले. त्याचवेळी भाजपकडून संविधानाची प्रत भेट देण्यात आली. मात्र, हे फोटो सभागृहात स्वीकारण्यास आणि लावण्यास काही सदस्यांनी विरोध दर्शवला. “फोटो भेट द्यायचे असतील तर ते दालनात द्यावेत, सभागृहाचा वेळ वाचवावा,” या मुद्द्यावरून सभागृहात बराच वेळ गोंधळ सुरू होता. टिपू सुलतान प्रकरणावरून राजकीय वातावरण तापले गेल्या काही दिवसांपासून उपमहापौरांच्या दालनातील टिपू सुलतान यांच्या छायाचित्रामुळे मालेगावचे राजकारण ढवळून निघाले आहे. त्यातच काँग्रेस प्रदेशाध्यक्ष हर्षवर्धन सपकाळ यांनी टिपू सुलतान यांची तुलना छत्रपती शिवाजी महाराजांशी केल्याने नवा वाद निर्माण झाला. टिपू सुलतान हा देखील छत्रपती शिवाजी महाराजांसारखाच योद्धा असल्याचे विधान सपकाळ यांनी केले होते, ज्याचे पडसाद आजच्या महासभेत उमटले. बनावट जन्म दाखल्यांचा प्रश्न ऐरणीवर मालेगावात गाजलेल्या बनावट जन्म दाखल्यांच्या प्रकरणावर आजच्या सभेत मोठा निर्णय होण्याची शक्यता आहे. माजी खासदार किरीट सोमय्या यांनी हे प्रकरण लावून धरल्यानंतर प्रशासनाने ३ हजार ४५ जन्म दाखले रद्द केले असून १ हजार ४४ जणांवर गुन्हे दाखल केले आहेत. सत्ताधारी ‘इस्लाम पार्टी’ आणि ‘समाजवादी पार्टी’ने निवडणुकीत हे दाखले पुन्हा मिळवून देण्याचे आश्वासन दिले होते. त्यानुसार, रद्द केलेले दाखले कायदेशीर मार्गाने पुन्हा वितरित करण्याचा ठराव सत्ताधाऱ्यांकडून आणला जाण्याची दाट शक्यता आहे. गरीब लोकांवर अन्याय झाला – मुश्तकिम डिग्निटी समाजवादी पक्षाचे मुश्तकिम डिग्निटी यांनी या प्रकरणी आक्रमक भूमिका मांडली. ते म्हणाले, “बनावट जन्म दाखल्या प्रकरणी थेट गुन्हे दाखल व्हायला नको होते. प्रशासकीय पातळीवर तहसीलदारांच्या सह्या आणि शिक्के खरे आहेत की नाही, याची हस्ताक्षर तज्ज्ञांकडून तपासणी व्हायला हवी. या प्रकरणात ज्यांनी खरोखर बनावट काम केले त्यांच्यावर कारवाई व्हावी, मात्र हजारो गरीब नागरिकांना वेठीस धरून त्यांच्यावर अन्याय करू नका. ज्यांना खरोखर दाखल्यांची गरज आहे, त्यांना ते नव्याने मिळावेत.” शिवसेनेचा ठरावाला विरोध सत्ताधारी पक्षाकडून जन्म दाखले पुन्हा बहाल करण्याचा प्रयत्न होत असताना, शिवसेनेने मात्र याला तीव्र विरोध दर्शवला आहे. बनावट दाखल्यांच्या माध्यमातून रोहिंगे किंवा बांगलादेशी घुसखोरांना पाठीशी घातले जात असल्याचा आरोप विरोधकांनी केला आहे.
Source link
