नागपूर जिल्ह्यातील उमरेड पोलीस स्टेशन हद्दीतील मोहपा गावाजवळ गुरुवारी गिट्टीने भरलेल्या ट्रक आणि दुचाकीमध्ये भीषण अपघात झाला. या दुर्घटनेत दुचाकीवरील वडील आणि मुलीचा जागीच मृत्यू झाला, तर एक युवती गंभीर जखमी झाली आहे. मृतकांमध्ये सुभाष केशव भिवणकर (वय ५०) आणि त्यांची मुलगी जान्हवी सुभाष भिवणकर (वय १८) यांचा समावेश आहे. दोघेही मोहपा येथील रहिवासी होते. वंशिका ज्ञानेश्वर नरुले (वय १८) ही गंभीर जखमी झाली असून तिच्यावर रुग्णालयात उपचार सुरू आहेत. ती देखील मोहपा येथीलच रहिवासी आहे. मिळालेल्या माहितीनुसार, सुभाष भिवणकर हे त्यांची मुलगी जान्हवी आणि वंशिका यांना बारावीच्या परीक्षेसाठी उमरेडमार्गे घेऊन जात होते. जान्हवी आणि वंशिका यांचा गुरुवारी बारावीचा पेपर होता. मोहपा गावाबाहेर जात असताना हा अपघात घडला. गिट्टीने भरलेल्या एम. एच. ४०, बीजी ७७५० क्रमांकाच्या ट्रकसोबत दुचाकीची जोरदार धडक झाली. अपघात इतका भीषण होता की, सुभाष भिवणकर आणि जान्हवी यांचा घटनास्थळीच मृत्यू झाला. अपघातानंतर ट्रकचालकाने वाहनासह पळून जाण्याचा प्रयत्न केला, मात्र स्थानिक नागरिकांनी त्याला पकडून गावात आणले. संतप्त जमावाने चालकाला मारहाण केली आणि ट्रकची केबिन पेटवून दिली. घटनेची माहिती मिळताच नागपूर जिल्हा पोलीस घटनास्थळी दाखल झाले. नागपूर जिल्ह्याचे पोलीस अधीक्षक हर्ष पोद्दार यांनी घटनास्थळी भेट दिली. आरसीबी पथक आणि इतर पोलीस दल तैनात करून परिस्थिती नियंत्रणात आणण्यात आली.
Source link
