नागपूर जिल्ह्यातील कळमेश्वर-नागपूर महामार्गावरील फेटरी गावातील ओयो हॉटेलमध्ये 22 जानेवारी रोजी एका तरुणीची चाकूने वार करून हत्या करण्यात आली होती. या प्रकरणात फरार असलेला आरोपी सौरभ जामगडे याला पोलिसांनी भोपाळ येथे तेलंगणा एक्सप्रेसमधून अटक केली आहे. रुचिता राजेश भांगे (वय 21, रा. बोरगाव, नागपूर) असे मृत तरुणीचे नाव आहे. पोलिसांनी दिलेल्या माहितीनुसार, हॉटेलमध्ये रुचिता आणि आरोपी सौरभ जामगडे यांच्यात वाद झाला. या वादातून सौरभने रुचिताच्या गळ्यावर चाकूने वार केले. गंभीर जखमी झाल्याने तिचा जागीच मृत्यू झाला. खुनानंतर आरोपीने हॉटेलच्या पहिल्या मजल्यावरून उडी मारून घटनास्थळावरून पळ काढला होता. या घटनेनंतर कळमेश्वर पोलिसांनी आरोपीच्या शोधासाठी चार पथके तयार केली होती. आरोपी सतत पोलिसांना हुलकावणी देत होता. घटनेच्या दिवशी तो पुण्याकडे गेल्याची माहिती मिळाल्याने पथके पुणे व पिंपरी चिंचवड येथे रवाना करण्यात आली होती. त्यानंतर 29 जानेवारी रोजी तो मोदा तालुक्यातील महालगाव येथे असल्याची माहिती पोलिसांना मिळाली. पोलिस महालगावकडे जात असतानाच, आरोपी नागपूरहून दिल्लीकडे जाणाऱ्या तेलंगणा एक्सप्रेसने निघाल्याची माहिती मिळाली. पोलिसांनी तात्काळ भोपाळ रेल्वे पोलिसांशी संपर्क साधून मदत मागितली. अखेर, भोपाळ येथे तेलंगणा एक्सप्रेसमध्ये सौरभ जामगडे याला ताब्यात घेण्यात आले. त्याला नागपूरला आणून कळमेश्वर पोलिसांच्या स्वाधीन करण्यात आले. कळमेश्वर पोलिसांनी आरोपीला न्यायालयात हजर केले असता, न्यायालयाने त्याला ४ फेब्रुवारीपर्यंत पोलिस कोठडी (PCR) सुनावली आहे.
Source link
