पुणे : आषाढी वारीच्या पार्श्वभूमीवर हिंदू जनजागृती समितीच्या वतीने विविध सामाजिक उपक्रम राबवण्यात आले. सामाजिक जाणीव जोपासत वारकऱ्यांना आरोग्य व सेवा पुरविण्याच्या उद्देशाने आरोग्य तपासणी, मंदिर स्वच्छता, अन्नदान, शालेय साहित्य वाटप अशा विविध उपक्रमांचे आयोजन करण्यात आले.
२१ जून रोजी मंगळवार पेठ गावठाण, पुणे येथे हिंदू जनजागृती समिती न्यासाच्या वतीने वारकऱ्यांसाठी आरोग्य तपासणी शिबिराचे आयोजन करण्यात आले. यामध्ये ३०० हून अधिक वारकऱ्यांची तपासणी करण्यात आली. यावेळी पायाला जखमा झालेल्या वारकऱ्यांना ड्रेसिंग करून औषधोपचार करण्यात आले. हे शिबिर डॉ. प्रज्ञा सीडाम आणि डॉ. प्राजक्ता बनकर यांच्या मार्गदर्शनाखाली पार पडले.
तसेच २२ जून रोजी हिंदू जनजागृती समिती व महाराष्ट्र मंदिर महासंघ यांच्या संयुक्त विद्यमाने माऊलींच्या पालखीचे पुष्पवृष्टी करून स्वागत करण्यात आले. यावेळी ख्रिस्ती मिशनरी मंडळींकडून वारीमध्ये बायबल वाटप व प्रचार केल्याचा प्रकार उघड झाला. यावर कठोर कारवाई करण्याची मागणी समितीने केली असून यासंदर्भात पुरंदरचे आमदार विजयबापू शिवतारे यांना निवेदन देण्यात आले. आमदार शिवतारे यांनी त्वरित पोलीस उपायुक्त राजकुमार शिंदे यांना दूरध्वनीवरून सूचना देत एफआयआर दाखल करून आवश्यक ती कारवाई करण्याचे आदेश दिले.
यावेळी ज्ञानेश्वर महाराज पालखी सोहळ्यातील मानकरीही उपस्थित होते. वारकऱ्यांची सेवा, परंपरेचे रक्षण आणि समाजजागृती असा त्रिवेणी संगम साधत हिंदू जनजागृती समितीने वारीनिमित्त समाजपयोगी उपक्रम राबवून कौतुकास्पद कार्य केले आहे.
