थायलंड भिक्षू सेक्स ब्लॅकमेलिंग घोटाळा: थायलंडमध्ये घडलेल्या बौद्ध भिक्षूंशी संबंधित एका लैंगिक घोटाळ्याने सध्या देशभरात खळबळ माजवली आहे. या प्रकरणात 35 वर्षीय विलावन अम्सावतला मुख्य आरोपी म्हणून अटक करण्यात आली आहे. ती ‘सिका मिस गोल्फ’ किंवा ‘मिस गोल्फ’ म्हणून ओळखली जाते. तिने 2019 पासून थायलंडमधील इन्फ्लूयएन्सर आणि श्रीमंत बौद्ध भिक्षूंना आपल्या सौंदर्याच्या जाळ्यात अडकवले. त्यांच्याशी शारीरिक संबंध प्रस्थापित केले. ती एवढ्यावरच थांबली नाही यानंतर आपण गर्भवती असल्याचा बनाव करून त्यांच्याकडून लाखो थाई बहत उकळले. ‘सिका मिस गोल्फ’ कोण आहे? असा प्रश्न यानिमित्ताने विचारला जातोय.
कोण आहे सिका मिस गोल्फ?
विलावन अम्सावत ही 35 वर्षीय थाई महिला आहे. जी या संपूर्ण घोटाळ्याची सूत्रधार मानली जाते. तिला 15 जुलै 2025 रोजी बँकॉकजवळील नोंथाबुरी येथून अटक करण्यात आली. तिच्याकडे पोलिसांना 5 मोबाईल फोन मिळाले, ज्यामध्ये 5600 आक्षेपार्ह व्हिडिओ, 80 हजार फोटो आणि अनेक चॅट रेकॉर्ड्स आढळले. हे पुरावे तिचे वरिष्ठ बौद्ध भिक्षूंशी असलेले जवळचे संबंध आणि ब्लॅकमेलिंगचे कृत्य उघड करतात. याशिवाय तिच्या घरातून 10 भिक्षूंचे भगवे वस्त्र देखील जप्त करण्यात आले. यातून या घटनेची तीव्रता लक्षात येऊ शकते.
कशी आखली फसवणुकीची योजना?
विलावनची कार्यपद्धती अत्यंत हुशार आणि नियोजनबद्ध होती. ती थायलंडमधील प्रसिद्ध आणि श्रीमंत मंदिरांमध्ये राहणाऱ्या प्रसिद्ध भिक्षूंना आपले लक्ष्य बनवायची. ती प्रथम त्यांच्याशी जवळीक साधायची, प्रेमसंबंध निर्माण करायची आणि त्यांच्याशी शारीरिक संबंध प्रस्थापित करायची. त्यानंतर, ती गर्भवती असल्याचा दावा करून भिक्षूंना ब्लॅकमेल करायची. ती त्यांच्याकडून लाखो थाई बहत उकळायची आणि पैसे न दिल्यास त्यांचे संबंध उघड करण्याची धमकी द्यायची.विलावनच्या बँक खात्यांमध्ये मंदिराच्या खात्यांमधून मोठ्या रकमा हस्तांतरित केल्या गेल्या होत्या. हे पैसे तिच्या ऑनलाइन जुगारातून मिळालेले उत्पन्न आहे पण ही रक्कम ब्लॅकमेलिंग आणि मंदिराच्या निधीच्या गैरवापरातून मिळवली गेल्याचे पोलीस तपासात समोर आलीय.
बौद्ध समुदायावर काय परिणाम झाला?
थायलंडमध्ये बौद्ध भिक्षूंना समाजात अत्यंत आदराचे स्थान आहे. थेरवाद बौद्ध धर्माचे नियम अत्यंत कठोर असून, त्यात ब्रह्मचर्य पाळणे आणि महिलांपासून अंतर ठेवणे बंधनकारक आहे. या घोटाळ्यामुळे बौद्ध भिक्षूंना मिळणारा आदर आणि बौद्ध संस्थांवरील लोकांचा विश्वास डळमळीत झाला आहे. आतापर्यंत या प्रकरणात 9 ज्येष्ठ भिक्षूंना त्यांचे भिक्षूत्व सोडावे लागले आहे. यामुळे देशभरात मंदिरांची शिस्त आणि आर्थिक पारदर्शकता सुधारण्यासाठी मागणी वाढली आहे. मठांचे ऑडिट आणि भिक्षूंच्या आचरणावर कडक नियंत्रण ठेवण्याची चर्चा जोर धरू लागली आहे.
घोटाळ्याने का माजली खळबळ?
थायलंडमध्ये बौद्ध धर्म हा समाजाचा पाया मानला जातो. बौद्ध भिक्षूंच्या या घोटाळ्याने सामान्य लोकांमध्ये संताप आणि आश्चर्याची लाट पसरली आहे. इतक्या मोठ्या प्रमाणात आणि नियोजनबद्ध पद्धतीने हा घोटाळा कसा घडला, याबाबत लोकांना आश्चर्य वाटते. या प्रकरणाने थायलंडमधील धार्मिक व्यवस्थेवर प्रश्नचिन्ह निर्माण केले आहे.
आता पुढे काय?
या घोटाळ्याच्या पार्श्वभूमीवर थायलंड सरकारने मंदिरांसाठी नवीन नियम लागू करण्याची तयारी सुरू केली आहे. लैंगिक शोषणाला गुन्हा ठरवण्यासाठी 1962 च्या कायद्यांमध्ये बदल करण्याची चर्चा सुरू आहे. मंदिरांच्या आर्थिक व्यवहारांवर कडक नियंत्रण ठेवण्यासाठी आणि भिक्षूंच्या आचरणावर देखरेख ठेवण्यासाठी नवीन उपाययोजना केल्या जाण्याची शक्यता आहे.
