लैंगिक अत्याचार गुन्हा: महिलांविरोधातील गुन्ह्यांमध्ये होणारी शिक्षा आणि कायदा कठोर होऊनही महिलांवर होणारे अत्याचार काही केल्या थांबत नसल्याचं स्पष्ट होत आहे. अल्पवयीन मुलींचा विनयभंग, महिलांवरील अमानावी अत्याचारांच्या याच सर्व घटनांमध्ये आणखी एक मन विचलित करणारी घटना समोर आली आहे, जिथं एका विवाहितेवर तिचा पती आणि सासऱ्यानं लैंगिक छळ केल्याची धक्कादायक बाब उघड झाली आहे.

ती एक पोस्ट आणि संशयास्पद अवस्थेत आढळलेले दोन मृतदेह…

केरळमधील 33 वर्षीय महिला आणि तिचं बाळ युएई अर्थात संयुक्त अरब अमिराती (UAE) इथं संशयास्पदरित्या मृतावस्थेत आढळले आणि या प्रकरणाला वाचा फुटली. 14 जुलैला ही घटना घडली असून, शारजाह इथं एका 33 वर्षीय महिलेसह तिच्या 1 वर्षाच्या मुलीचा मृतदेह आढळला. शारजाह येथील अल नहदा इथं ही घटना घडल्याचं सांगण्यात येत आहे.

घटनाक्रम मन सुन्न करणारा…

प्राथमिक तपासानुसार 2020 मध्ये या महिलेचं लग्न झालं आणि ती पतीसह शारजाह इथं आली होती. पोलीस तपासातून उघड झाल्यानुसार सुरुवातीला या महिलेची हत्या करण्यात आली आणि त्यानं ती आत्महत्या भासवण्याचा प्रयत्न आरोपींनी केला. या संपूर्ण प्रकरणात एक Suicide Note समोर आली असून, महिलेनं ती फेसबुक पोस्ट केल्याचं सांगण्यात आलं.

सोशल मीडिया पोस्टच्या माध्यमातून या महिलेनं पती, नणंग आणि सासऱ्यावर गंभीर आरोप लावत सासरे सतत हुंड्याची रक्कम मारग आणि आपल्याला मारहाण करत असल्याचं सांगितलं. इतकंच नव्हे, तर सासऱ्यांनी आपल्यावर लैंगिक अत्याचार केले असून, हे सर्व ठाऊक असतानाही पतीनं मात्र यावर मौन बाळगल्याचा खळबळजनक खुलासा या महिलेनं केला.

अश्लील व्हिडीओ आणि शरीरसंबंध…

पतीनं आपल्याला अश्लील व्हिडीओ दाखवत शरीरसंबंधांसाठी बळजबरी केल्याचं सांगत, आपण फक्त स्वत:साठी नव्हे तर वडिलांसाठीसुद्धा हे लग्न केल्याचं तो म्हणाला असं या महिलेनं तिच्या पोस्टमध्ये लिहिलं. उजळ वर्णाच्या या महिलेला कुरूप करण्यासाठी तिचं मुंडनसुद्धा केलं. या महिलेनं पतीच्या विवाहबाद्य संबंधांना विरोध केला त्यावेळी तिच्या लेकीवरही पतीनं हात उगारला होता.

केरळमध्ये गुन्ह्याची नोंद…

सदर महिलेच्या आईनं केरळमधील कुंदरा पोलीस स्थानकात याप्रकणी गुन्हा दाखल केला आहे. जिथं पोलिसांनी पतीला मुख्य आरोपी ठरवत मृत महिलेचा सासरा आणि नणंदेला सहआरोपी ठरवलं आहे. भारतीय दंडसंविधानानुसार (बीएनएस) कलम 85 (महिलेसह क्रूर वागणूक), कलम 108 (आत्महत्येसाठी प्रवृत्त करणं) यासह हुंडाविरोधी कायद्याअंतर्गत गुन्हा नोंदवण्यात आला आहे.

हेसुद्धा वाचा : पडक्या घरात बॉल शोधायला गेला अन् सापडला हाडांचा सांगाडा, नोकिया फोनमुळं उलगडलं मृत्यूचं गूढ

दरम्यान महिलेच्या आईनं केलेल्या दाव्यानुसार मागील काही काळापासून तिला आईसोबतही संपर्क साधू दिला जात नव्हता. याशिवाय तिचा सातत्यानं मानसिक आणि शारीरिक छळ केला जात होता. मुलीनं घटस्फोटासाठी कायदेशीर नोटीस पाठवल्यानंतरही त्यावर पतीकडून लक्ष दिलं गेलं नाही आणि तिचा छळ सुरूच राहिला.