भारतात मुस्लिम लोकसंख्या: भारत जगातील सर्वात जास्त मुस्लिम लोकसंख्या असलेला देश बनू शकतो अशी शक्यता आहे. प्यू रिसर्च सेंटरने जाहीर केलेल्या आकडेवारीतून धक्कादायक माहिती समोर आली आहे. प्यू रिसर्च सेंटरच्या अहवालात सर्व धर्मातील लोकसंख्येची आकडेवारी प्रसिद्ध करण्यात आली आहे. यात हिंदू लोकसंख्येची आकडेवारी काहीशी चिंताजनक आहे.
2010 ते २०२० दरम्यान, मुस्लिम समुदाय जगातील सर्वात वेगाने वाढणारा धार्मिक गट म्हणून उदयास आला आहे. जागतिक लोकसंख्येतील ख्रिश्चन धर्माचा वाटा कमी झाला आहे. लोकसंख्येत घट होऊनही, ख्रिश्चन धर्म अजूनही जगातील सर्वात मोठा धार्मिक गट आहे. प्यू रिसर्च सेंटरच्या 2010 ते 2020 पर्यंत जागतिक धार्मिक परिदृश्य कसे बदलले’ या अलीकडील अहवालात हे आकडे समोर आले आहेत. पुढील 25 वर्षांत भारत जगातील सर्वाधिक मुस्लिम असलेला देश असेल असेही या अवहालात म्हंटले आहे.
प्यू रिसर्चच्या अहवालानुसार मुस्लिम लोकसंख्या 347 दशलक्षांनी वाढली, जी इतर सर्व धर्मांच्या एकत्रित वाढीपेक्षा जास्त आहे. जागतिक स्तरावर मुस्लिमांचा वाटा 2010 मध्ये 23.9 टक्के वरून 2020 मध्ये 25.6 टक्क्यांपर्यंत वाढला. ही वाढ प्रामुख्याने उच्च जन्मदर आणि तरुण लोकसंख्या यासारख्या लोकसंख्याशास्त्रीय घटकांमुळे झाली. “मुस्लिमांमध्ये, मुलांचा जन्मदर मृत्युदरापेक्षा जास्त आहे. त्यांचे सरासरी वय (24 वर्षे) गैर-मुस्लिमांपेक्षा (33 वर्षे) कमी आहे,” असे प्यू येथील वरिष्ठ लोकसंख्याशास्त्रज्ञ कॉनराड हॅकेट यांनी स्पष्ट केले. शिवाय, या वाढीमध्ये धार्मिक धर्मांतराचा फारसा वाटा नाही.
जगातील सर्वात जास्त मुस्लिम लोकसंख्या असलेल्या आशिया-पॅसिफिक प्रदेशात मुस्लिम लोकसंख्येची सर्वाधिक वाढ दिसून आली. 2010 ते 2020 दरम्यान या प्रदेशातील मुस्लिम लोकसंख्या 16.2 टक्क्यांनी वाढली. मध्य पूर्व-उत्तर आफ्रिका प्रदेशात मुस्लिम लोकसंख्येच्या 94.2 टक्के आहेत, तर उप-सहारा आफ्रिकेत हे प्रमाण 33 टक्के आहे. अहवालात हिंदू लोकसंख्येच्या आकेडवारीवर नजर टाकली असता. 2010 ते 2020 दरम्यान हिंदूंची लोकसंख्या 12 टक्केने वाढली आहे. जी जागतिक लोकसंख्या वाढीइतकीच आहे. 2020 मध्ये हिंदूंची संख्या 1.2 अब्ज होती, जी जागतिक लोकसंख्येच्या 14.9 टक्के इतकी आहे. भारतातील हिंदू लोकसंख्या 2010 मध्ये 80 टक्के वरून 2020 मध्ये 79 टक्के पर्यंत किंचित घटली, तर मुस्लिम लोकसंख्या 14.3 टक्के वरून 15.2 टक्के पर्यंत वाढली. भारतातील मुस्लिम लोकसंख्या 3.56 कोटींनी वाढली. अहवालात म्हटले आहे की हिंदू धर्म स्वीकारण्याचा दर खूप कमी आहे आणि त्यांचा प्रजनन दर जागतिक सरासरीइतकाच आहे – ज्यामुळे त्यांचा वाटा स्थिर राहिला आहे.
प्यू अहवालानुसार, जागतिक लोकसंख्या वाढीच्या बरोबरीने हिंदू आणि यहुदी लोकसंख्या वाढत राहिली. भारत, नेपाळ आणि मॉरिशसमध्ये हिंदू हा सर्वात मोठा धार्मिक गट आहे. जरी भारतातील हिंदूंचा वाटा किंचित कमी झाला असला तरी, देशाच्या लोकसंख्येचा तो अजूनही सर्वात मोठा वाटा आहे. जगात ख्रिश्चनांची संख्या 2.18 अब्ज वरून 2.3 अब्ज झाली, परंतु त्यांचा जागतिक वाटा 30.6 टक्के वरून 28.8 टक्केपर्यंत घसरला. अहवालात असेही म्हटले आहे की प्रमुख धार्मिक गटांमध्ये, बौद्ध धर्मीयांच्या संख्येत घट झाली आहे. याचे कारण लोकसंख्येचे वृद्धत्व आणि चीनमध्ये लोकसंख्या वाढीच्या दरात घट आहे, जिथे बौद्ध धर्मीयांची संख्या सर्वाधिक आहे.
प्यू रिसर्चच्या मते, जर सध्याची लोकसंख्याशास्त्रीय पद्धत अशीच चालू राहिली तर 2050 पर्यंत मुस्लिम लोकसंख्या (2.8 अब्ज) आणि ख्रिश्चन लोकसंख्या (2.9 अब्ज) जवळजवळ समान होऊ शकते. 2050 पर्यंत भारत इंडोनेशियाला मागे टाकून जगातील सर्वात मोठी मुस्लिम लोकसंख्या असलेला देश बनू शकतो. हिंदू लोकसंख्या 1.4 अब्ज पर्यंत पोहोचण्याचा अंदाज आहे, जो जागतिक लोकसंख्येच्या सुमारे 14.9 टक्के असेल.
