पाऊस रोख नोट्स: अमेरिकेतील मिशिगन राज्यातील डेट्रॉईड शहरात पैशांचा पाऊस पडला आहे. नाही ही काही परीकथा वगैरे नाही खरोखरच इथे एका ठिकाणी आकाशातून चलनी नोटा पडल्यात. शहराच्या ईस्टसाईड भागातील एका कबरीजवळ आकाशातून फुलाच्या पाकळ्या आणि नोटांचा पाऊस पडला. यामागे एक विशेष कारण आहे. हे प्रकरण सध्या चर्चेचा विषय ठरत असून आकाशातून पैशांचा पाऊस पडतानाचा व्हिडीओ व्हायरल झालाय.
नेमकं घडलं काय?
डेट्रॉईटच्या ईस्टसाईडमध्ये राहणारे डॅरेल थॉमस हे स्थानिकांमध्ये दानशूर व्यक्ती म्हणून ओळखले जायचे. त्यांच्या मृत्यूनंतरही, त्यांच्या स्वभावाप्रमाणे त्यांच्या नातेवाईकांनी समाजाप्रती आपण देणं लागतो ही भावना कायम ठेवत आगळ्यावेगळ्या पद्धतीने डॅरेल यांना श्रद्धांजली वाहिली. शुक्रवारी, 27 जून रोजी, थॉमस यांच्या कुटुंबाने त्यांना दफन करण्यात आलेल्या ठिकाणी एका हेलिकॉप्टरमधून गुलाबाच्या पाकळ्या आणि चलनी नोटांचा पाऊस पाडम्याची व्यवस्था केली. ठरलेल्या योजनेनुसार, कॉनर स्ट्रीटजवळील ग्रॅटिओट अव्हेन्यूवर गुलाबाच्या पाकळ्या आणि पैसे हेलिकॉप्टरमधून टाकण्यात आले. ‘डेट्रॉईट फ्री प्रेस’मधील वृत्तानुसार, दुपारी 1 वाजून 27 मिनिटांनी डेट्रॉईटमध्ये थॉमसच्या मालकीच्या कार वॉश शोरूम शाईन एक्सप्रेसजवळ ही आगळीवेळी श्रद्धांजली वाहण्यात आली.
4 लाख 30 हजार रुपयांची कॅश हेलिकॉप्टरमधून उधळली
15 जून रोजी वयाच्या 58 व्या वर्षी थॉमस यांचे निधन झाले. त्यांची मुलं, डॅरेल आणि जोन्टे यांनी हेलिकॉप्टरमधून पैसे ड्रॉप करण्याची व्यवस्था केली. या दोघांनी 5 हजार डॉलर्सची कॅश आणि गुलाबाच्या पाकळ्या हेलिकॉप्टरमधून पाडल्या. गुलाबाच्या पाकळ्या आकाशातून सोडल्या जातील याबद्दल स्थानिक पोलिसांना आगाऊ सूचना देण्यात आली होती. मात्र पैसे देखील टाकले जातील याची पोलिसांना काहीच कल्पना नव्हती. भारतीय चलनानुसार, थॉमसच्या आठवणीत त्याच्या मुलांनी 4 लाख 30 हजार रुपयांची कॅश हेलिकॉप्टरमधून उधळली. या नोटा गोळा करण्यासाठी लोकांची झुंबड उडाली.
दातृत्वाची देणगी लाभलेला व्यक्ती
थॉमसची भाची, क्रिस्टल पेरीने ही कृती खरोखरच भारावून टाकणारी होती, असं म्हटलं आहे. “दातृत्वाची देणगी लाभलेला व्यक्ती म्हणून थॉमसला ओळखलं जायचं. त्याच्या आठवणीत समाजासाठी केलेली ही कृती खरोखरच अनोखी होती,” असं पेरी म्हणाली. व्यवसायिक असलेला थॉमस हा नॅशनल हॉट रॉड असोसिएशनमध्ये परवानाधारक व्यावसायिक रेस कार ड्रायव्हरदेखील होता.
व्हिडीओ झाला व्हायरल
ऑनलाइन व्हायरल झालेल्या व्हिडीओमध्ये हेलिकॉप्टरमधून पैशांचा वर्षाव होत असल्याचे दिसत आहे. या कृतीसाठी डेट्रॉईटमधील या उद्योजकाच्या कुटुंबियांचं सोशल मीडियावरुन कौतुक केलं जात आहे. आपल्याला जिथे दफन केलं जाईल तिथे अशाप्रकारे नोटांची उधळण करावी अशी थॉमसची इच्छा असल्याने त्याच्या लेकांची त्याची इच्छा मृत्यूनंतर पूर्ण केली.
डॅरेल थॉमस, कार लॉन्ड्रीचे मालक आणि आदरणीय समुदायातील सदस्य म्हणून हजारो डॉलर्स हेलिकॉप्टरमधून सुरू करण्यात आले.
स्थानिक माध्यमांच्या म्हणण्यानुसार, अल्झायमरच्या अलीकडेच त्याचा मृत्यू झाला pic.twitter.com/kspesn91of
– xavi_mansan 54 (@javiververa57211) 1 जुलै, 2025
केली जात आहे चौकशी
मात्र कोणतीही पूर्व कल्पना न देता हेलिकॉप्टरमधून नोटा फेकल्याप्रकरणी फेडरल एव्हिएशन अॅडमिनिस्ट्रेशन सध्या या घटनेची चौकशी करत आहे. दुसरीकडे डेट्रॉईट पोलिसांनी, आपण सदर प्रकरणा कोणाचीही चौकशी करत नसल्याचं स्पष्ट केलं आहे.
