आसाममधील होजाई जिल्ह्यात शनिवारी सकाळी हत्तींचा एक कळप सैरंग-नवी दिल्ली राजधानी एक्सप्रेसच्या धडकेत आला. या अपघातात सात हत्तींचा मृत्यू झाला आणि एक पिल्लू जखमी झाले. अधिकाऱ्यांनी सांगितले की, अपघातात ट्रेनचे इंजिन आणि पाच डबेही रुळावरून घसरले.

हा अपघात सकाळी 2:17 वाजता चांगजुराई गावाजवळ झाला. सुरुवातीला आठ हत्ती मरण पावल्याची माहिती होती, परंतु नंतर एका हत्तीचे पिल्लू जिवंत असून गंभीर जखमी झाल्याची पुष्टी झाली. या अपघातात कोणताही प्रवासी जखमी झाल्याची बातमी नाही.

नगावचे विभागीय वन अधिकारी सुहास कदम यांनी सांगितले की, परिसरात दाट धुके असल्यामुळे हा अपघात झाला असावा अशी शक्यता आहे. मृत हत्तींचे शवविच्छेदन केले जात आहे, तर स्थानिक पशुवैद्य जखमी हत्तीवर उपचार करत आहेत.

घटनास्थळाची 3 छायाचित्रे…

नॉर्थईस्ट फ्रंटियर रेल्वे (NFR) चे मुख्य जनसंपर्क अधिकारी कपिंजल किशोर शर्मा यांनी सांगितले की, हा अपघात गुवाहाटीपासून सुमारे १२६ किलोमीटर दूर लुमडिंग विभागांतर्गत जमुनामुख-कांपुर सेक्शनमध्ये झाला. अपघाताची जागा अधिकृत हत्ती कॉरिडॉर नाही.

अधिकाऱ्यांच्या माहितीनुसार, हत्तींचा कळप अचानक रेल्वेसमोर आला. लोको पायलटनी आपत्कालीन ब्रेक लावले, पण तरीही हत्ती रेल्वेला धडकले. वन अधिकाऱ्यांनी सांगितले की, मृत हत्तींचे अंत्यसंस्कार घटनास्थळाजवळच केले जातील.