मुळशी केसरी २०२५ स्पर्धा उत्साहात संपन्न; मनीष रायते मानकरी
घोटवडे फाटा (ता. मुळशी) : मुळशी केसरी प्रतिष्ठानच्या वतीने सलग १८व्या वर्षी आयोजित मुळशी केसरी कुस्ती स्पर्धा २०२५ घोटवडे फाटा येथील सुंदरबन लॉनजवळ मोठ्या उत्साहात व जल्लोषात पार पडली. या स्पर्धेमुळे मुळशी तालुक्यात कुस्तीप्रेमींच्या उत्साहाला उधाण आले होते. मातीच्या आखाड्यात रंगलेल्या चुरशीच्या लढती पाहण्यासाठी हजारो प्रेक्षकांनी उपस्थिती लावली होती.
महाराष्ट्रातील विविध जिल्ह्यांतील नामांकित तसेच उदयोन्मुख मल्लांनी स्पर्धेत सहभाग घेतला. प्राथमिक फेऱ्यांपासून अंतिम सामन्यांपर्यंत प्रत्येक लढत प्रेक्षकांना खिळवून ठेवणारी ठरली. ताकद, चपळाई व तांत्रिक कौशल्याचे दर्शन घडवत मल्लांनी आखाडा गाजवला.
मुळशी केसरीचा मान मनीष रायतेकडे
अंतिम लढतीत दमदार खेळ साकारत मनीष रायते (इंदापूर) याने मुळशी केसरी २०२५चा किताब पटकावला. सागर देवकाते (इंदापूर) याने उपविजेतेपद मिळविले. अविनाश गावडे (इंदापूर) तृतीय, तर अभिजित भोईर (मुळशी) चतुर्थ क्रमांकावर राहिला.
अमृता केसरीचा मान भारत मदने (बारामती) याने मिळविला, तर मुन्ना झुंजुरके (मुळशी) उपविजेता ठरला.
वजनगटांतील विजेते
५७ किलो : स्वप्निल शेलार (बारामती) प्रथम, अथर्व गोळे (पिरंगूट) द्वितीय
६१ किलो : शिवराज पायगुडे (आगळांबे) प्रथम, ओंकार ताठे (भोर) द्वितीय
६५ किलो : अमोल वालगुडे (वेल्हा) प्रथम, युवराज सातकर (मावळ) द्वितीय
७० किलो : योगेश्वर तापकीर (हवेली) प्रथम, अभिजित शेडगे (वेल्हा) द्वितीय
७४ किलो : नामदेव कोकाटे (इंदापूर) प्रथम, शुभम जाधव (दौंड) द्वितीय
(प्रत्येक वजनगटात तृतीय व चतुर्थ क्रमांकासाठीही चुरशीच्या लढती रंगल्या.)
मुळशीरत्न पुरस्काराने सन्मान
यावेळी सामाजिक, शैक्षणिक, क्रीडा व सांस्कृतिक क्षेत्रात उल्लेखनीय योगदान देणाऱ्या सुमित–सुनीता कैलास दाभाडे, दर्शन दत्तात्रय काळभोर व पै. पृथ्वीराज राजेंद्र मोहोळ यांना “मुळशीरत्न पुरस्कार २०२५” प्रदान करण्यात आला. तसेच आमदार शंकरभाऊ मांडेकर यांचा मुळशी केसरी प्रतिष्ठानच्या वतीने विशेष सन्मान करण्यात आला.
विजेत्या व उपविजेत्या मल्लांना रोख बक्षिसे, चषक, मानचिन्हे व सन्मानपत्र देऊन गौरविण्यात आले. नवोदित मल्लांच्या कामगिरीचाही विशेष सत्कार करण्यात आला.
कार्यक्रमास आमदार शंकर मांडेकर, सह. पोलीस आयुक्त मनोज पाटील, माजी आमदार चंद्रकांत मोकाटे, हिंद केसरी अमोल चडे यांच्यासह अनेक मान्यवर उपस्थित होते.या भव्य कार्यक्रमास आमदार शंकर मांडेकर, सह. पोलीस आयुक्त मनोज पाटील, माजी आमदार चंद्रकांत मोकाटे, हिंद केसरी अमोल चडे यांच्यासह अनेक मान्यवरांची उपस्थिती लाभली. यामध्ये अमित कंधारे, महादेव कोंढरे, शांताराम इंगवले, राजेंद्र डबडे, दगडू काका करंजावणे, दिलीप वेडे पाटील, नगरसेवक बंडू केमसे, मधुर दाभाडे, कुणाल वेडे पाटील, राजाभाऊ वाघ, सचिन खैरे, रामभाऊ गायकवाड, छबुनाथ बेरड, संजय पन्हाळकर, राजाभाऊ इंगवले, सुरेश हुलावळे, मिलिंद वाळुंज, संतोष देशमुख, गोविंद उचगे, युवा नेते सचिन आंग्रे, भानुदास पानसरे, राहुल पवळे, बबनराव दगडे (पो. पाटील), भरत वांजळे, सुनील बांदल, रमेश पवळे, नाना शिंदे, सूर्यकांत भुंडे, बाबुजी वाळंज, धनंजय दगडे, वैभव मुरकुटे, संदीप ढमढेरे, योगेश सोनवणे आदी मान्यवरांचा समावेश होता.
उपस्थित मान्यवरांनी कुस्ती ही महाराष्ट्राची गौरवशाली परंपरा असून ग्रामीण भागातील तरुणांना प्रोत्साहन देण्यासाठी अशा स्पर्धा आवश्यक असल्याचे मत व्यक्त केले.
स्पर्धेच्या यशस्वी आयोजनासाठी मुळशी केसरी प्रतिष्ठानचे अध्यक्ष राजेंद्र बांदल, संस्थापक भास्कर मोहोळ, दत्ता काळभोर, सचिन मोहोळ तसेच सर्व संयोजन समिती, पदाधिकारी, कार्यकर्ते व स्वयंसेवकांनी विशेष परिश्रम घेतले. उत्कृष्ट नियोजन व शिस्तबद्ध व्यवस्थेमुळे मुळशी केसरी २०२५ ही स्पर्धा तालुक्यासाठी अभिमानास्पद ठरली.
