परभणी हिंगोली विधान परिषद निवडणुकीमध्ये शिंदे सेनेकडून उमेदवारीसाठी प्रयत्न करणाऱ्या अभिमन्यू खोतकर यांनी अखेर उमेदवारीतून माघार घेतली आहे. यासंदर्भात त्यांनी फेसबुक वर पोस्टही टाकली आहे. उमेदवारीच्या चक्रव्युव्हा मध्ये सापडलेल्या अभिमन्यू यांनी माघार घेतल्याने विप्लव बाजोरिया यांचा मार्ग मोकळा झाला आहे. परभणी हिंगोली विधान परिषदेची जागा महायुतीकडून कोणी लढवायची याबाबत मोठा खल सुरू होता. राष्ट्रवादी, शिंदे गट व भाजपा यांच्याकडे जवळपास एकसमान मतदान असल्यामुळे या जागेवर राष्ट्रवादीने दावा सांगितला होता. त्यामुळे यावेळी उमेदवारी मिळणार की नाही याबाबत शंका निर्माण झाल्याने माजी आमदार विप्लव बाजोरिया यांनी उपमुख्यमंत्री एकनाथ शिंदे यांची भेट घेतल्यानंतर लगेचच उपमुख्यमंत्री सुनेत्रा पवार यांचीही भेट घेतली. जागा राष्ट्रवादीला सुटल्यास त्यांच्या पक्षाकडून उमेदवारी मिळावी या उद्देशाने त्यांनी उपमुख्यमंत्री पवार यांची भेट घेतल्याची चर्चा सुरू होती. दरम्यान वरिष्ठ पातळीवर झालेल्या चर्चेमध्ये परभणी हिंगोली ची जागा शिवसेनेला सुटणार हे स्पष्ट झाले होते. त्यामुळे या ठिकाणावरून माजी आमदार बाजोरिया यांच्यासह जालना येथील माजी मंत्री अर्जुन खोतकर यांचे चिरंजीव अभिमन्यू खोतकर यांनी उमेदवारीसाठी दावा केला होता. त्यानुसार खोतकर यांनी मतदारांच्या भेटी घेण्यास सुरुवात केली होती. उमेदवारीसाठी शिंदे गटात रस्सीखेच सुरू झाल्यामुळे नेमकी उमेदवारी कोणाला मिळणार याबाबत राजकीय वर्तुळात मोठी चर्चा सुरू झाली होती. शिंदे सेनेच्या वरिष्ठ पातळीवर माजी मंत्री खोतकर व विप्लव बाजोरिया यांचे पिताश्री गोपीकिशन बाजोरिया यांचे चांगले वजन आहे. त्यामुळे पक्षाच्या वरिष्ठ पातळीवरील नेते तसेच अर्थपूर्ण राजकारणासाठी प्रसिद्ध असलेले बाजोरिया यांच्या चक्रव्युहा मध्ये अभिमन्यू खोतकर सापडले होते. पक्षाचे अंतर्गत चक्रव्यूह भेदण्याचा प्रयत्न अभिमन्यू यांनी केला मात्र त्यांना अपयश येत असल्याचे दिसू लागले होते. त्यानंतर अभिमन्यू खोतकर यांनी फेसबुक वर पोस्ट टाकून निवडणुकीच्या रिंगणातून माघार घेत असल्याचे जाहीर केले. त्यामुळे आता परभणी हिंगोली विधान परिषद निवडणुकीत महायुतीच्या शिंदे सेनेकडून विप्लव बाजोरिया यांचा उमेदवारीचा मार्ग मोकळा झाला आहे. काय आहे फेसबुक पोस्टमध्ये विधान परिषद निवडणूक लढणार नाही : माननीय शिंदे साहेब, खासदार श्रीकांत शिंदे साहेब आमदार अर्जुन खोतकर साहेब यांचा आदेश अंतिम. आपण सर्वांनी दिलेल्या सहकार्याबद्दल मनःपूर्वक आभार. सर्वांच्या साथीच्या जोरावर इथपर्यंत आलो आणि यापुढे ही वाटचाल अधिक बळकट आणि जोरदार राहील. धन्यवाद
Source link
