.

गाव नकाशात तुटक रेषेने दर्शविलेला हा रस्ता अनेक वर्षांपासून वादाच्या भोवऱ्यात अडकला होता. त्यामुळे शेतकऱ्यांना शेतीमालाची ने-आण करताना मोठ्या अडचणींचा सामना करावा लागत होता. या कारवाईस उपअधीक्षक भूमी अभिलेख राजेंद्र भाबड, लासलगाव पोलिस ठाण्याचे सहायक निरीक्षक दीपक पाटील आणि महसूल सहायक शरद घाटगे यांचे विशेष सहकार्य लाभले. मंगळवारी (दि. २६) विंचूरचे मंडळ अधिकारी संतोष डुंबरे यांनी प्रत्यक्ष घटनास्थळी उपस्थित राहून दोन्ही बाजूंच्या शेतकऱ्यांना रस्त्याचे कायदेशीर तसेच व्यावहारिक महत्त्व समजावून सांगितले. त्यानंतर भूमी अभिलेख विभागाने रस्त्याची मोजणी करून हद्दीच्या खुणा निश्चित केल्या. प्रशासनाचा सकारात्मक दृष्टिकोन आणि गावकऱ्यांच्या समजूतदारपणामुळे कोणताही वाद न होता लोकसमजुतीने हा शिवरस्ता पूर्णपणे खुला करण्यात आला. रस्ता खुला झाल्याने विष्णुनगर आणि हनुमाननगर परिसरातील शेतकऱ्यांना शेतीमाल वाहतूक, शेतीची मशागतीची कामे आणि दैनंदिन ये-जा अधिक सुलभ होणार आहे.

हा जुना शिवरस्ता कायदेशीर आणि शांततापूर्ण मार्गाने खुला करण्यासाठी ग्राम महसूल अधिकारी शुभम पाटसकर यांच्यासह स्थानिक शेतकरी बांधवांनी महत्त्वपूर्ण सहकार्य केले. महसूल, भूमी अभिलेख आणि पोलिस प्रशासनाने समन्वयाने काम केल्यामुळे कायदा व सुव्यवस्थेचा कोणताही प्रश्न यावेळी निर्माण झाला नाही.

विष्णुनगर ते हनुमाननगर दरम्यानचा गाव नकाशात तुटक रेषेने दर्शविलेला शिवरस्ता अनेक वर्षांपासून बंद होता. शेतकऱ्यांना पर्यायी मार्गांचा वापर करावा लागत असल्याने त्यांचा वेळ आणि खर्च वाढत होता. उपविभागीय अधिकारी डॉ. शशिकांत मंगरुळे आणि तहसीलदार विशाल नाईकवाडे यांच्या मार्गदर्शनाखाली महसूल, भूमी अभिलेख आणि पोलिस प्रशासनाने समन्वय साधून प्रत्यक्ष पाहणी केली. त्यानंतर मोजणी करून रस्त्याच्या हद्दी निश्चित करण्यात आल्या.