मध्य प्रदेशातील धार येथे मजुरांनी भरलेले पिकअप वाहन स्कॉर्पिओला धडक दिल्यानंतर उलटले. या अपघातात आतापर्यंत दोन मुलांसह 12 लोकांच्या मृत्यूची पुष्टी झाली आहे. 13 जण गंभीर जखमी आहेत.

हा अपघात इंदूर-अहमदाबाद राष्ट्रीय महामार्गावरील चिकलिया फाट्यावर जिओ पेट्रोल पंपाजवळ बुधवारी रात्री सुमारे साडेआठ वाजता झाला. प्राथमिक माहितीनुसार, पिकअपमध्ये 35 मजूर होते.

धार जिल्हा रुग्णालयाचे ड्युटी डॉक्टर छत्रपाल सिंह यांनी सांगितले की, 10 जणांना गंभीर अवस्थेत इंदूरच्या एमवाय रुग्णालयात रेफर करण्यात आले आहे. मृत्यूचा आकडा वाढण्याची शक्यता आहे.

एसपी मयंक अवस्थी म्हणाले- पिकअप वाहन भरधाव वेगात होते. चालकाचे नियंत्रण सुटल्याने वाहन तीन-चार वेळा उलटले. याच दरम्यान रस्त्याच्या दुसऱ्या बाजूला जाऊन स्कॉर्पिओला धडकले.

दुसरीकडे, इंदूरमधील रुग्णालयांनाही सतर्क करण्यात आले आहे. सीएमएचओ डॉ. माधव हसानी यांनी सांगितले की, धार येथून येणाऱ्या जखमींवर उत्तम उपचार करण्याचे निर्देश दिले आहेत.

बघा, फोटो…

स्कॉर्पिओला धडक दिल्यानंतर पिकअप वाहन उलटले.

मृतदेह दुसऱ्या पिकअप वाहनाने पोस्टमॉर्टमसाठी जिल्हा रुग्णालयात पाठवण्यात आले.

जखमींना धार येथील जिल्हा रुग्णालयात दाखल करण्यात आले आहे.

अपघातात 12 लोकांचा मृत्यू झाला. यात 2 मुलांचा समावेश आहे.

रुग्णालयात जागा कमी पडल्याने एकाच बेडवर दोन मुलांना झोपवून उपचार केले जात आहेत.

रुग्णालयात मृत आणि जखमींचे नातेवाईक पोहोचत आहेत.