भारतीय कृषी क्षेत्रात आधुनिक तंत्रज्ञानाचा वापर वाढवण्यासाठी एव्ही पॉलिमर्स लिमिटेडने एक मोठे पाऊल उचलले आहे. कंपनीने आपली उपकंपनी एव्ही इको स्पार्क प्रायव्हेट लिमिटेडच्या माध्यमातून ‘कृषीबडी’ हे कृत्रिम बुद्धिमत्तेवर अर्थात एआय आधारित स्मार्ट फार्मिंग प्लॅटफॉर्म लाँच केल्याची घोषणा केली आहे. या उपक्रमामुळे शेतकऱ्यांना आता शेतीविषयक निर्णय घेणे सोपे होणार असून त्यांच्या उत्पन्नात वाढ होण्यास मदत होणार आहे. काय आहे ‘कृषीबडी’ आणि त्याची वैशिष्ट्ये?
‘कृषीबडी’ हा एक प्रगत शेती सहाय्यक आहे. जो विशेषतः भारतातील लहान शेतकऱ्यांच्या गरजा लक्षात घेऊन तयार करण्यात आला आहे. याची काही प्रमुख वैशिष्ट्ये खालीलप्रमाणे आहेत. बहुभाषिक AI इंटरफेस:
शेतकरी आता त्यांच्या स्वतःच्या प्रादेशिक भाषेत आवाज, मजकूर किंवा फोटोंच्या माध्यमातून शेतीविषयक माहिती मिळवू शकतील. यामुळे तंत्रज्ञानातील भाषेचा अडथळा दूर झाला आहे. सॅटेलाइट क्रॉप मॉनिटरिंग:
उपग्रहाद्वारे पिकांचे रिअल-टाइम निरीक्षण केले जाईल, ज्यामुळे पिकांचे आरोग्य आणि शेतातील परिस्थितीची अचूक माहिती मिळेल. नफा कॅल्क्युलेटर :
थेट बाजारभाव आणि शेतीसाठी झालेला खर्च यांचा विचार करून शेतकरी आपल्या संभाव्य नफ्याचा अंदाज लावू शकतील. कीड आणि रोग नियंत्रण:
स्थानिक हवामान आणि डेटाच्या आधारे पिकांवरील रोग किंवा किडीबद्दल शेतकऱ्यांना आधीच अलर्ट (सूचना) दिले जातील. हायटेक शेतीवर भर:
या प्लॅटफॉर्मद्वारे सॅटेलाइट आधारित पीक देखरेख, बाजारभावावर आधारित नफा कॅल्क्युलेटर आणि पिकांवरील रोग व कीड नियंत्रणासाठी आगाऊ सूचना दिल्या जातील. यामुळे शेतकऱ्यांना अचूक निर्णय घेणे सोपे होईल. जागतिक बाजारपेठेची दारे उघडणार
केवळ माहितीच नव्हे, तर कृषीबडी ॲप शेतकऱ्यांना जागतिक बाजारपेठेशी जोडण्याचे कामही करणार आहे. निर्यात नियोजनासारख्या वैशिष्ट्यांमुळे शेतकरी आणि शेतकरी उत्पादक संस्थांना त्यांचे उत्पादन आंतरराष्ट्रीय स्तरावर विकण्याची संधी मिळणार आहे. तसेच, या प्लॅटफॉर्मवरील अधिकृत डेटाचा वापर करून शेतकऱ्यांना बँकांकडून कर्ज मिळवणेही सोपे होणार आहे. कंपनीची आर्थिक कामगिरी आणि ध्येय
एव्ही पॉलिमर्सने या आर्थिक वर्षाच्या तिसऱ्या तिमाहीत 701.98 लाख रुपयांचा निव्वळ नफा नोंदवला आहे. कंपनीचे व्यवस्थापकीय संचालक चिंतेन पटेल यांनी सांगितले, की योग्य माहिती उपलब्ध झाल्यास लाखो शेतकऱ्यांचे आयुष्य बदलू शकते. कृषीबडीच्या माध्यमातून आम्ही प्रगत तंत्रज्ञान प्रत्येक शेतकऱ्यासाठी सोपे आणि उपयुक्त बनवत आहोत. भविष्यात आम्ही यामध्ये आयओटी सोल्यूशन्सचाही समावेश करणार आहोत. एव्ही पॉलिमर्सने सन 1993 पासून पॉलिमर उत्पादनात आपले नाव कमावले आहे. आता कृषीबडीच्या माध्यमातून एग्रिटेक क्षेत्रात केलेली ही एन्ट्री भारतीय शेतीला अधिक कार्यक्षम आणि जागतिक स्तरावर स्पर्धात्मक बनवण्यासाठी मैलाचा दगड ठरणार आहे.
Source link
