खेळाच्या जगातील एक सरळ सत्य आहे की जो खेळाडू जितका प्रसिद्ध आहे, त्याची किंमत तितकीच जास्त असते. सध्याच्या काळात सुपरस्टार खेळाडू फक्त त्यांच्या संघांसाठी खेळणारे प्यादे राहिलेले नाहीत. ते स्वतः जागतिक ब्रँड आहेत. याच कारणामुळे लिओनेल मेस्सी किंवा क्रिस्टियानो रोनाल्डोसारखे दिग्गज खेळाडू करिअरच्या उतरणीवर असूनही जगातील सर्वाधिक कमाई करणारे खेळाडू आहेत. या खेळाडूंना पैसे देण्याचे बिझनेस मॉडेल खूप वेगळे आहे. कुठे ‘डिफर्ड मनी’ (भविष्यात देय) वापरून कर वाचवला जात आहे, तर कुठे ‘लिव्हरेज’ (दबाव) वापरून खेळाडू हवी ती किंमत वसूल करत आहेत. फुटबॉल – मेस्सीला अमेरिकन क्लब इंटर मियामीमध्ये पगारासोबतच हिस्सेदारीही मिळाली 38 वर्षीय लिओनेल मेस्सी जेव्हा युरोप सोडून अमेरिकन लीगच्या इंटर मियामी संघात सामील झाला, तेव्हा त्याला फक्त 800 कोटी रुपयांचा वार्षिक पगारच मिळाला नाही, तर क्लबमध्ये ‘इक्विटी’ (हिस्सेदारी) आणि लीगच्या ब्रॉडकास्ट पार्टनरच्या महसुलातून एक निश्चित हिस्सा देखील देण्यात आला. तर, रोनाल्डो सौदी क्लब अल-नासर क्लबमध्ये वर्षाला 2000 कोटी रुपये कमावत आहेत. हे पैसे सौदीच्या ‘पब्लिक इन्व्हेस्टमेंट फंड’मधून येतात. रोनाल्डोच्या स्टार पॉवरचा वापर करून सौदी अरेबिया आपली प्रतिमा सुधारू इच्छितो. बेसबॉल – शोहेई ओटानीसोबत ‘डिफर्ड मनी’ मॉडेल, क्लबचा कर वाचवण्याचा करार मेजर लीग बेसबॉलमध्ये कोणतीही सॅलरी कॅप नाही, परंतु एका निश्चित मर्यादेपेक्षा जास्त खर्च केल्यास ‘लक्झरी टॅक्स’ भरावा लागतो. जपानी सुपरस्टार शोहेई ओटानीने लॉस एंजिलिस डोजर्ससोबत 10 वर्षांसाठी सुमारे 6450 कोटी रुपयांचा करार केला. ओटानी दरवर्षी सुमारे 18.5 कोटी रुपये पगार घेतील. उर्वरित सुमारे 6300 कोटी रुपये त्यांना त्यांच्या निवृत्तीनंतर (2034 ते 2043 पर्यंत) हप्त्यांमध्ये दिले जातील. या ‘डिफर्ड मनी’ मॉडेलने संघाला लक्झरी टॅक्सपासून वाचवले. एनएफएल व बास्केटबॉल – कमाईतील वाटा आणि संघावर दबाव टाकून रक्कम वाढवणे एनएफएलमध्ये डलास काउबॉयजचे डॅक प्रेस्कॉट (4 वर्षांसाठी 2230 कोटी) सर्वात महागडे खेळाडू आहेत. प्रेस्कॉट लीगचे सर्वोत्तम खेळाडू नाहीत, पण त्यांनी योग्य वेळी संघावर दबाव आणला. संघाकडे दुसरा पर्याय नव्हता, त्यामुळे त्यांना ऐतिहासिक करार द्यावा लागला. तर, एनबीएमध्ये महसूल खेळाडू आणि मालकांमध्ये 50-50 वाटला जातो. 10 वर्षांपेक्षा जास्त अनुभव असलेले सुपरस्टार्स सॅलरी कॅपच्या 35% पर्यंत घेऊ शकतात. त्यामुळे स्टीफन करीसारखे खेळाडू या हंगामात सुमारे 550 कोटी रुपये कमावत आहेत. बॉक्सिंग – खेळाडूची मार्केट व्हॅल्यू आणि पे-पर-व्ह्यू सर्वात महत्त्वाचे बॉक्सिंगमध्ये मार्केट व्हॅल्यू आणि पे-पर-व्ह्यूची ताकद आहे. मेक्सिकन बॉक्सर अल्वारेजला नुकतीच टेरेंस क्रॉफर्डविरुद्ध हार पत्करावी लागली. असे असूनही, कॅनेलोला या लढतीसाठी सुमारे 910 कोटी रुपये मिळाले. तर, विजेता क्रॉफर्डला सुमारे 92 कोटी रुपये मिळाले. गोल्फ – सौदीची नवीन स्पर्धा बनली मोठ्या कमाईचा आधार वर्ल्ड नंबर-1 स्कॉटी शेफलरने 2024 आणि 2025 मध्ये दरवर्षी सुमारे 280 कोटी रुपये कमावले. दुसरीकडे, जॉन रॅमने 2025 मध्ये एकही स्पर्धा जिंकली नाही, पण सौदी-फंडेड ‘LIV गोल्फ’मध्ये खेळल्यामुळे त्याला सुरुवातीचा साइनिंग बोनस सुमारे 3 हजार कोटी रुपये मिळाला.
Source link
