नाशिकमधील भोंदूबाबा अशोक खरात प्रकरणावरून राजकीय वातावरण अधिकच तापले असून शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी राज्य सरकारवर जोरदार टीका केली आहे. या सगळ्या प्रकरणाला सरकारही तितकेच जबाबदार आहे, असे स्पष्ट म्हणत त्यांनी सरकारच्या भूमिकेवर प्रश्नचिन्ह उपस्थित केले. इंटेलिजन्स यंत्रणा विरोधकांवर लक्ष ठेवू शकते, मग अशा अघोरी आणि क्रूर कृत्यांची माहिती असूनही कारवाई का झाली नाही? असा थेट सवाल त्यांनी उपस्थित केला. अनेक वर्षे सत्तेत असतानाही सरकार एका महिलेच्या तक्रारीची वाट पाहत बसले, हे चुकीचे असल्याचे त्यांनी ठामपणे सांगितले. राऊत यांनी नाशिकमधील कायदा-सुव्यवस्थेवरही प्रश्न उपस्थित करत तीव्र शब्दांत टीका केली. नाशिक खरोखर कायद्याचा बालेकिल्ला असता, तर अशोक खरातसारखी प्रकरणे निर्माणच झाली नसती, असे ते म्हणाले. याशिवाय त्यांनी बीडमधील काही घडामोडींवर भाष्य करत हे सगळे भाजपचे हस्तक आहेत, असा आरोप केला. अशोक खरात हा भाजपचा प्रचारक असल्याचा गंभीर आरोप करत, निवडणुकांमध्ये त्याचा वापर केला गेला असल्याचेही त्यांनी म्हटले. यावेळी त्यांनी बच्चू कडू यांच्या भेटीचा संदर्भ देत आणखी आरोप मांडले. खरात बच्चू कडूंना आशीर्वाद देताना भाजपच्या मंत्रिमंडळात मंत्री बनून या, असे सांगत होता. त्याने इतर पक्षांचा उल्लेख केला नाही, असे सांगत त्यांनी खरातला भाजपची सहानुभूती असल्याचा दावा केला. याचा अर्थ भाजप त्याला सहकार्य करत होता, असा थेट आरोपही त्यांनी केला. मोबाईल पोलिसांकडे असताना फोटो बाहेर कसे? दरम्यान, या प्रकरणात महिलांचे फोटो बाहेर येत असल्याच्या मुद्द्यावरही राऊत यांनी संताप व्यक्त केला. यापूर्वी अशा प्रकारे पीडित महिलांची ओळख उघड होत नव्हती. पण आता प्रथमच असे घडत आहे, असे ते म्हणाले. जप्त केलेले मोबाईल पोलिसांकडे असताना हे फोटो बाहेर कसे आले, असा सवाल त्यांनी उपस्थित केला. गृहखाते भाजपकडे असल्याचा उल्लेख करत त्यांनी सरकारवर जबाबदारी ढकलली. प्रकरणाची सखोल चौकशी करावी तपास प्रमुख म्हणून काम पाहणाऱ्या तेजस्वी सातपुते यांनी या प्रकरणाची सखोल चौकशी करावी, अशी मागणी करत राऊत यांनी सरकारला धारेवर धरले. महिलांचे फोटो लीक होणे ही गंभीर बाब आहे, याची सरकारला लाज वाटली पाहिजे, असे म्हणत त्यांनी निष्पक्ष आणि कडक कारवाईची मागणी केली. या प्रकरणामुळे राज्यातील राजकारणात आरोप-प्रत्यारोपांचा जोर वाढत असून पुढील काही दिवसांत आणखी वादंग निर्माण होण्याची शक्यता आहे. आज मोदी विरोधकांशी चर्चा करणार पश्चिम आशियातील संकटावर चर्चा करण्यासाठी केंद्राने आज बोलावलेल्या सर्वपक्षीय बैठकीच्या पार्श्वभूमीवर, खासदार संजय राऊत म्हणाले की, 25 दिवस उलटून गेले आहेत आणि आज मोदी विरोधकांशी चर्चा करणार आहेत. ट्रम्प यांनी भारताला आधीच गुलाम बनवले आहे. भारत आता इस्रायलचाही गुलाम झाला आहे. जर मोदींनी विरोधकांशी आधीच चर्चा केली असती, तर ते देशाच्या हिताचे ठरले असते.
Source link
