आखाती देशांमध्ये सुरू असलेल्या इराण-इस्राईल संघर्षाच्या पार्श्वभूमीवर इंधन पुरवठ्याबाबत देशभरात चर्चा सुरू असताना राज्य शासनाने गॅस सिलेंडर पुरवठा सुरळीत ठेवण्यासाठी विविध उपाययोजना सुरू केल्या आहेत. घरगुती तसेच व्यावसायिक वापराच्या गॅस सिलेंडरचा पुरवठा खंडित होऊ नये यासाठी प्रशासन सतर्क झाले आहे. ठाणे जिल्हा प्रशासनाने या पार्श्वभूमीवर 24 तास कार्यरत राहणारा नियंत्रण कक्ष सुरू केला असून नागरिकांसाठी 8169230665 हा हेल्पलाईन क्रमांक जाहीर करण्यात आला आहे. संभाव्य टंचाई टाळण्यासाठी आणि गॅस पुरवठा साखळीवर लक्ष ठेवण्यासाठी जिल्हा स्तरावर विशेष समितीही स्थापन करण्यात आली आहे. अन्न व नागरी पुरवठा विभागाने राज्यभर नियंत्रण कक्ष आणि जिल्हास्तरीय समित्या स्थापन करण्याचा निर्णय घेतला आहे. त्यानुसार ठाणे जिल्ह्यात जिल्हाधिकाऱ्यांच्या अध्यक्षतेखाली समिती कार्यरत करण्यात आली आहे. या समितीत पोलीस प्रशासन, जिल्हा पुरवठा अधिकारी आणि सरकारी तेल कंपन्यांचे प्रतिनिधी सहभागी असतील. गॅस सिलेंडरचा पुरवठा सुरळीत राहावा, वाहतूक आणि वितरणात अडथळे येऊ नयेत तसेच कायदा व सुव्यवस्था राखली जावी, यासाठी समिती दररोज परिस्थितीचा आढावा घेणार आहे. युद्धजन्य परिस्थिती लक्षात घेऊन प्रशासनाने नियंत्रण कक्षाद्वारे सातत्याने देखरेख ठेवण्यास सुरुवात केली आहे. गॅस एजन्सी आणि पेट्रोलपंपांना आवश्यक सूचना देण्यात आल्या आहेत. सध्या पेट्रोलपंपांवर पुरेसे इंधन उपलब्ध असून गॅस सिलेंडर बुक केल्यानंतर साधारणपणे पंचवीस दिवसांच्या आत वितरण होत असल्याची माहिती अधिकाऱ्यांनी दिली आहे. सध्या गॅसचा कोणताही तुटवडा नसल्याचे स्पष्ट करत नागरिकांनी अफवांवर विश्वास ठेवू नये आणि घाबरून जाऊ नये, असे आवाहन शिधावाटप अधिकारी सुरेखा चव्हाण यांनी केले आहे. दरम्यान, आखाती प्रदेशातील तणावाचा परिणाम काही उद्योगांवर दिसू लागल्याचे चित्र आहे. गुढीपाडव्याचा सण जवळ आला असताना नाशिकमध्ये साखरेपासून बनवले जाणारे हारकडे तयार करणाऱ्या कारखान्यांना व्यावसायिक गॅस सिलेंडर मिळण्यात अडचणी येत असल्याचे सांगितले जात आहे. गॅसअभावी काही कारखाने तात्पुरते बंद ठेवण्याची वेळ उद्योजकांवर आली आहे. त्यामुळे आधी घेतलेल्या ऑर्डरही रद्द कराव्या लागत असल्याची माहिती कारखानदारांनी दिली आहे. सणासुदीच्या काळात अशा अडचणी निर्माण झाल्याने व्यापाऱ्यांमध्ये चिंता व्यक्त केली जात आहे.
Source link
