प्रतिनिधी | टाकरखेडा शंभू सार्वजनिक शिवजयंती उत्सव समिती, अमरावती यांच्या वतीने छत्रपती शिवाजी महाराज जयंती निमित्त जोक स्टेडियम ते काँग्रेस नगर रोड स्थित शिवविचारपीठ (खुले रंगमंच), शिवटेकडी येथे शिवजन्मोत्सव उत्साहात साजरा करण्यात आला. कार्यक्रमाची सुरुवात सकाळी ८.३० वाजता छत्रपती शिवाजी महाराजांच्या अश्वरूढ पुतळ्याला अभिवादन व मानवंदना देऊन झाली. तसेच महाराष्ट्राचे दिवंगत उपमुख्यमंत्री यांना श्रद्धांजली अर्पण करण्यात आली. यावेळी प्रमुख वक्त्या आराध्या ठाकरे यांनी शिवछत्रपतींचे आदर्श मूल्य, धार्मिक धोरण आणि शेतकरी धोरण यावर प्रभावी विवेचन केले. शिवराय हे जाती-धर्मापलीकडचे राजे होते. शासनाने शिवाजी महाराजांचे शेती विषयक धोरण अवलंबिले, तर शेतकरी पुन्हा समृद्ध होऊ शकतो. असे प्रतिपादन त्यांनी केले. पावनखिंडीचे वर्णन करताना त्यांनी अरे तोफे आधी न मरे बाजी, सांगा मृत्यूला असे उद्गार काढत उपस्थितांना भावूक केले. तसेच औरंगजेबाने आपल्या मुलाला दिलेल्या उपदेशाचे स्वगत ‘इसमे कोई शक नही शहजादे की हम खुश नसीब है कि हमे दुश्मन भी मिला तो शिवा जैसा मिला’ आपल्या शैलीत सादर करत त्यांनी सर्वांची मने जिंकली. या प्रसंगी छत्रपती शिवाजी महाराज विषयावरील जिल्हास्तरीय सामान्य ज्ञान स्पर्धेत आराध्या ठाकरे यांनी तृतीय क्रमांक पटकावला. त्यांना ३ हजार रुपये रोख, शिल्ड व प्रमाणपत्र मान्यवरांच्या हस्ते प्रदान करण्यात आले. कार्यक्रमाला प्रमुख वक्ते म्हणून प्रेमकुमार बोके व जिल्हाध्यक्ष सुरेंद्र आंडे, तर मुख्य अतिथी म्हणून आमदार संजय खोडके, ज्येष्ठ सामाजिक कार्यकर्ते रामेश्वर अभ्यंकर उपस्थित होते. तसेच विभागीय माहिती आयुक्त रवींद्र ठाकरे, अमरावती शासकीय वैद्यकीय महाविद्यालयाचे अधिष्ठाता डॉ. एन.जे. राऊत, मराठा सेवा संघाचे उपाध्यक्ष अरविंद गावंडे, शिवश्री प्रदीप अंधारे, जिल्हा सचिव संजय ठाकरे, तालुकाध्यक्ष गजानन ठाकरे, अभिजीत पोहोकार, श्रीकांत लंगोटे आदी मान्यवरांची उपस्थिती होती. कार्यक्रमाचे संचालन समन्वयक संजय ठाकरे यांनी केले. कार्यक्रमाच्या यशस्वितेसाठी हेमंत गावंडे, दीपक लोखंडे, राम बायस्कर, मयूर विघे, ऋषभ राऊत आदींनी परिश्रम घेतले.
Source link
