इंग्लंडचे दिग्गज वेगवान गोलंदाज जेम्स अँडरसन यांनी एकदा ‘बॅझबॉल’ची व्याख्या करताना म्हटले होते की, हा खेळ तसा खेळण्याचा प्रयत्न आहे, जशी आम्ही लहानपणी कल्पना केली होती – रोमांचक, वेगवान आणि मजेदार. विशेष म्हणजे, या विचाराची सर्वात सजीव आणि भावनिक झलक आता इंग्लंडमधील मनोरंजन केंद्रांवर आणि खेळाच्या मैदानांवर दिसत आहे, जिथे 50 ते 87 वर्षांपर्यंतचे लोक ‘वॉकिंग क्रिकेट’च्या माध्यमातून खेळाचा नवीन आनंद घेत आहेत. वॉकिंग क्रिकेट केवळ एक खेळ नाही, तर एकटेपणाविरुद्ध एक प्रभावी शस्त्र आहे. केंट क्रिकेट कम्युनिटी ट्रस्टच्या प्रकल्प अधिकारी एमी इलिज यांच्या मते, प्रत्येक काउंटीमध्ये याचे संघ भरभराटीस येत आहेत. लॉर्ड्सच्या इनडोअर स्कूलमध्ये पहिला इंटर-काउंटी वॉकिंग क्रिकेट महोत्सव आयोजित करण्यात आला, ज्याने याची वाढती लोकप्रियता अधोरेखित केली. केंटमधील फोकस्टोन येथील थ्री हिल्स स्पोर्ट्स सेंटरमध्ये वॉकिंग क्रिकेट केवळ खेळ नाही, तर सामुदायिक एकजुटीचे व्यासपीठ बनले आहे. येथे 87 वर्षांपर्यंतचे खेळाडू सहभाग घेतात. ऐकण्याची समस्या, स्मृतिभ्रंश (डिमेंशिया) किंवा गतिशीलता (हालचाल) संबंधित समस्यांनी ग्रस्त असलेले लोकही न डगमगता मैदानात उतरतात. अर्धी धाव घेण्यासारखी सवलत याला अधिक मनोरंजक बनवते. या खेळाने अनेक जीवनांना नवी दिशा दिली आहे. 62 वर्षीय कर्णधार मार्क म्हणतात की, येथे प्रतिभेपेक्षा सहभाग आणि आनंद महत्त्वाचा आहे. 2022 मध्ये दोन्ही गुडघ्यांच्या ऑपरेशननंतर ग्रॅहम दोन काठ्यांच्या आधाराने चालत होते. वॉकिंग क्रिकेटमध्ये सामील झाल्यानंतर अवघ्या 18 महिन्यांत त्यांचे वजन एक-चतुर्थांश कमी झाले आणि त्यांनी एका षटकात सहा षटकार मारून सर्वांना आश्चर्यचकित केले. सैन्यात असताना माल्टासाठी खेळलेले जॉन म्हणतात की, निवृत्तीनंतर या खेळाने त्यांना नवीन जीवन दिले आहे. अनेकदा खेळाडूंना हे देखील आठवत नाही की सामना कोणी जिंकला, कारण येथे विजयापेक्षा हसू महत्त्वाचे आहे. वॉकिंग क्रिकेट काय आहे आणि नियम – नावाप्रमाणेच स्पष्ट आहे, या खेळात धावण्यास सक्त मनाई आहे. हा क्रिकेटचा एक संथ, सुरक्षित आणि सोपा प्रकार आहे, जो विशेषतः वृद्धांसाठी आणि ज्यांना चालण्या-फिरण्यात अडचणी (मोबिलिटी इश्यूज) आहेत, अशा लोकांसाठी डिझाइन केला आहे.
– यात दुखापतीचा धोका कमी करण्यासाठी लेदर बॉलऐवजी सॉफ्ट बॉल आणि अनेकदा प्लास्टिकच्या उपकरणांचा वापर केला जातो.
– गोलंदाज चालत चेंडू फेकतो, क्षेत्ररक्षक चालत चेंडू पकडतात आणि फलंदाज धावा घेण्यासाठी धावत नाही, तर चालतो. सर्वात मजेदार नियम हा आहे की फलंदाज बाद झाल्यानंतरही खेळत राहतो, फक्त गोलंदाजी करणाऱ्या संघाला बोनस म्हणून पाच धावा मिळतात.
Source link
