अंजनगाव सुर्जी ते अकोट मार्गावरील भंडाराजजवळ मंगळवारी २४ फेब्रुवारी दुपारी कार, एसटी बस यांच्यात समोरासमोर धडक झाली. त्यात ६५ वर्षीय कारचालकाचा जागीच मृत्यू झाला असून, पाच जण जखमी झाले. मार्गातील वळणामुळे हा अपघात झाल्याचा प्राथमिक अंदाज वर्तवण्यात येत आहे. कारमधील सर्व एकाच कुटूंबातील असून, ते मुऱ्हादेवी येथे दर्शनासाठी जात होते. शालिकराम रामचंद्र वानरे (६५, रा. अकोट) असे मृतक कार चालकांचे नाव असून, कुसूम शलीकराम वानरे, प्रथमेष शालीकराम वानरे, उत्कर्षा प्रथमेष वानरे, सुमन गवई हे जखमी झाले . यांच्यासोबत बसमधील एक महिला प्रवासी जखमी आहे. वानरे कुटूंबिय अकोटवरुन सियाझ कारने अंजनगाव सुर्जीमार्गे मुऱ्हादेवी येथे दर्शनासाठी निघाले होते. मार्गातील भंडारज जवळ अंजनगावकडून अकोटकडे जाणाऱ्या एसटी बससोबत कारची समारासमोर धडक झाली. अपघातस्थळापासून शंभर मीटर वर वळण आहे. या वळणामुळे वाहनं अनियंत्रीत झाले व एकमेकांवर जाऊन आदळले. या अपघातात कारचालक शालीकराम वानरे यांना गंभीर दुखापत झाली व त्यांचा घटनास्थळीच मृत्यू झाला. याचवेळी एसटी बसमधील काही प्रवाशांनाही किरकोळ दुखापत झाली. अपघाताची माहिती मिळताच ठाणेदार सुरज बोंडे त्यांच्या पथकासह घटनास्थळी दाखल झाले होते. अपघातातील जखमींना अंजनगाव व अकोट येथील रुग्णालयात दाखल करण्यात आले आहे. कारमध्ये शालीकराम वानरे यांचा मुलगा प्रथमेष, पत्नी, सुन, सासू असे होते. प्रथमेष यांचा उत्कर्षा यांच्यासोबत पाच दिवसांपूर्वी विवाह झाला आहे. त्यामुळे शालीकराम वानरे व कुटूंबिय नवदाम्पत्याला घेऊन दर्शनासाठी मुऱ्हादेवी येथे जात होते मात्र तत्पुर्वीच शालीकराम वानरे यांच्यावर काळाने झेप घेतली. नवदाम्पत्याला घेऊन जात होते दर्शनासाठी
Source link
