अकोला जिल्ह्यातील बाळापूर तालुक्यातील मनारखेड गावात हनुमान मूर्ती प्रतिष्ठापना सोहळ्यानिमित्त मंदिराच्या कळसावरून 10, 20 आणि 50 रुपयांच्या नोटांसह 5 व 10 रुपयांच्या नाण्यांची मोठी उधळण करण्यात आली. या अजब प्रकारामुळे उधळलेले पैसे गोळा करण्यासाठी भाविकांनी मोठी गर्दी केल्याने परिसरात काही काळ झुंबड उडाली आणि गोंधळाचे वातावरण निर्माण झाले होते. मंदिराच्या कळसावरून नोटांची उधळण सुरू होताच त्या वेचण्यासाठी भाविकांनी एकच झुंबड उडवली, ज्यामध्ये काही जण थेट मंडपावर चढले तर काही वाऱ्यामुळे लांबवर उडणाऱ्या नोटांच्या मागे धावताना दिसले. या धावपळीमुळे परिसरात काही काळ चेंगराचेंगरीची भीतीदायक परिस्थिती निर्माण झाली होती, परंतु सुदैवाने कोणतीही दुर्घटना घडली नाही. मात्र या संपूर्ण सोहळ्यात सुरक्षेच्या उपाययोजनांचा अभाव असल्याचे प्रकर्षाने दिसून आले. हा आमच्या श्रद्धेचा भाग- ग्रामस्थ गावकऱ्यांनी या प्रकाराचे समर्थन करत याला आपल्या भक्तीचा भाग असल्याचे म्हटले असून, मिळवलेल्या नोटा आणि नाणी श्रद्धेपोटी आपल्या घरातील देव्हाऱ्यात ठेवणार असल्याचे भाविकांनी सांगितले. मात्र सार्वजनिक कार्यक्रमांतील अशा उधळणीच्या योग्यतेबाबत आता उलटसुलट चर्चा सुरू झाली असून, सुरक्षेच्या कारणास्तव प्रशासनाने अशा घटनांची गांभीर्याने दखल घेण्याची गरज व्यक्त होत आहे.
Source link
