प्रतिनिधी | लासूर स्टेशन म.शि.प्र. मंडळ संचलित छत्रपती शाहू महाविद्यालयात ४ फेब्रुवारी २०२६ रोजी व्यसनमुक्ती जागृतीसाठी भित्तीपत्रक स्पर्धा झाली. डॉ. बाबासाहेब आंबेडकर मराठवाडा विद्यापीठाच्या सहकार्याने ही स्पर्धा झाली. विजेत्यांचा बक्षीस वितरण समारंभ आज उत्साहात पार पडला. विद्यार्थ्यांनी स्पर्धेत उत्स्फूर्त सहभाग घेतला. त्यांनी व्यसनमुक्तीवर आशयपूर्ण भित्तीपत्रके सादर केली. स्पर्धेचे परीक्षण प्रा. डॉ. माया कटारिया आणि प्रा. डॉ. सविता वावगे यांनी केले. त्यांनी प्रथम, द्वितीय, तृतीय आणि दोन उत्तेजनार्थ क्रमांक निश्चित केले. विजेत्यांना सन्मानचिन्ह, प्रमाणपत्र आणि रोख बक्षिसे देण्यात आली. प्रा. डॉ. माया कटारिया यांनी विद्यार्थ्यांना मार्गदर्शन केले. त्यांनी सांगितले की, मोबाईलचा अति वापर हेही व्यसन आहे. यामुळे विद्यार्थ्यांचे लक्ष विचलित होते. हे व्यसन समाजासाठीही घातक ठरते. प्रा. डॉ. सविता वावगे यांनी व्यसनांचे शारीरिक आणि मानसिक प्रकार स्पष्ट केले. माणूस हळूहळू व्यसनाच्या आहारी कसा जातो, याचे विश्लेषण त्यांनी केले. विद्यार्थ्यांनी सादर केलेली भित्तीपत्रके बोलकी असून त्यातून व्यसनाचे दुष्परिणाम प्रभावीपणे मांडले आहेत, असे त्यांनी सांगितले. शेवटी त्यांनी व्यसनावर आधारित एक कथा सांगून विद्यार्थ्यांना अंतर्मुख केले. प्राचार्य प्रा. डॉ. बाळासाहेब पवार यांनी अध्यक्षीय भाषणात ‘कळतं पण वळत नाही’ आणि ‘अति तिथे माती’ या म्हणींचा संदर्भ दिला. अतिरेक शेवटी विनाशाकडे नेतो, असे त्यांनी स्पष्ट केले. अति खाणे हेही व्यसन असल्याचे त्यांनी सांगितले. मोबाईलचा वापर योग्य की अयोग्य हे प्रत्येकाने ठरवावे, असे मत त्यांनी मांडले. कार्यक्रमास उपप्राचार्य प्रा. विलास अहिरे, विद्यार्थी विकास मंडळ प्रमुख प्रा. डॉ. मधुकर साठे, आय.क्यू.ए.सी. समन्वयक प्रा. डॉ. ज्ञानेश्वर होळकर, प्रा. दीपक जाधव, प्रा. सुषमा शिरसागर आदी मान्यवर उपस्थित होते. प्रास्ताविक प्रा. डॉ. मधुकर साठे यांनी केले. सूत्रसंचालन प्रा. उमा खुरसने यांनी केले. आभार प्रा. दीपक जाधव यांनी मानले. या वेळी महाविद्यालयातील सर्व प्राध्यापक, विद्यार्थी आणि विद्यार्थिनी मोठ्या संख्येने उपस्थित होते. लासुरस्टेशन येथील छत्रपती शाहू महाविद्यालयात व्यसनमुक्ती जागृती भित्तीपत्रक स्पर्धेचे आयोजन. कोणत्याही गोष्टीचा अतिरेक हा विनाश घडवतो ^अतिरेक शेवटी विनाशाकडे नेतो. अति खाणे हेही व्यसन आहे. मोबाईलचा वापर योग्य की अयोग्य हे प्रत्येकाने ठरवावे आणि त्या अनुसार अति वापराच्या सवयी बदलाव्या. – डॉ. बाळासाहेब पवार
Source link
