उपमुख्यमंत्री अजित पवार यांच्या अपघाती निधनानंतर, ज्या विमानाचा अपघात झाला त्या ‘लिअरजेट ४५’ (Learjet 45) विमानाबद्दल आणि ते चालवणाऱ्या कंपनीबद्दल अनेक खळबळजनक तपशील समोर येत आहेत. हे विमान केवळ अजित दादांच्या प्रवासासाठीच नाही, तर यापूर्वी देशातील अनेक दिग्गज नेत्यांच्या दिमतीलाही होते, अशी माहिती आता समोर आली आहे. बारामती येथे बुधवारी (२८ जानेवारी) झालेल्या भीषण विमान अपघातात मृत्युमुखी पडलेले उपमुख्यमंत्री अजित पवार ज्या विमानातून प्रवास करत होते, त्या विमानाचा इतिहास अत्यंत ‘हाय-प्रोफाईल’ असल्याचे समोर आले आहे. व्हीएसआर व्हेंचर्स (VSR Ventures) या कंपनीच्या मालकीच्या ‘लिअरजेट ४५’ या विमानाने गेल्या वर्षीच्या बिहार विधानसभा निवडणुकीत अनेक बड्या नेत्यांना सेवा दिली होती. फडणवीसांसह शिंदेंनी केला होता प्रवास मिळालेल्या माहितीनुसार, २०२५ मध्ये पार पडलेल्या बिहार विधानसभा निवडणुकीच्या प्रचारासाठी भाजप नेत्यांकडून याच विमानाचा वापर करण्यात आला होता. महाराष्ट्राचे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि आसामचे मुख्यमंत्री हिमंता बिस्वा सरमा यांच्यासह भाजपच्या अनेक ज्येष्ठ नेत्यांनी निवडणूक प्रचारासाठी पाटण्याला जाण्यासाठी याच विमानाचा वापर केला होता. विशेष म्हणजे, कालच्या अपघातात जीव गमावलेले कॅप्टन सुमित कपूर आणि कॅप्टन शांभवी यांनीच या नेत्यांचे वैमानिक म्हणून काम पाहिले होते. कंपनीची मालकी आणि पार्श्वभूमी ‘व्हीएसआर व्हेंचर्स’ ही कंपनी बिहारमधील मुझफ्फरपूर येथील रहिवासी कॅप्टन व्ही. के. सिंह यांच्या मालकीची आहे. या कंपनीच्या सुरक्षिततेबाबत आता प्रश्नचिन्ह उपस्थित केले जात आहे, कारण ज्येष्ठ पत्रकार सुहेल सेठ आणि इतरांनी या कंपनीच्या विमानांच्या देखभाल-दुरुस्तीवर गंभीर आरोप केले आहेत. अपघाताच्या दिवशीचे नियोजित वेळापत्रक २८ जानेवारी रोजी या विमानाचे वेळापत्रक अत्यंत व्यस्त होते. अजित पवारांना बारामतीत सोडल्यानंतर हे विमान तेलंगणातील शमसाबाद विमानतळावरून आंध्र प्रदेशचे प्रसिद्ध व्यापारी महेश कुमार रेड्डी यांना घेऊन पाटण्याला जाणार होते. सकाळी १०:३० वाजता हे विमान पाटण्याला उतरणे अपेक्षित होते. रात्री ९:३० वाजता पुन्हा पाटण्याहून उड्डाण करण्याचे नियोजन होते. मात्र, बारामतीत झालेल्या भीषण अपघातामुळे हे नियोजन कोलमडले आणि त्यानंतर महेश रेड्डी यांना दुसऱ्या चार्टर्ड विमानाने पाटण्याला जावे लागले. DGCA कडून अपघाताचा तपास सुरू एकाच विमानाने देशातील इतक्या महत्त्वाच्या नेत्यांना सेवा दिली असताना, त्याच्या सुरक्षेबाबत कोणतीही तडजोड झाली होती का? तसेच या विमानाचा देखभालीचा रेकॉर्ड कसा होता? या दिशेने आता नागरी विमान वाहतूक संचालनालय (DGCA) तपास करत आहे.
Source link
