युनायटेड फोरम ऑफ बँक युनियनच्या वतीने २७ जानेवारी रोजी पुकारण्यात आलेला देशव्यापी बँक संप यशस्वी झाला. पाच दिवसीय बँकिंग आठवड्याची गेल्या अनेक वर्षांपासून प्रलंबित असलेली मागणी पूर्ण व्हावी, यासाठी हा संप करण्यात आला होता. या संपात सर्व राष्ट्रीयकृत बँकांतील कर्मचाऱ्यांनी शंभर टक्के सहभाग नोंदवत उत्स्फूर्त प्रतिसाद दिला. पुण्यात स्टेट बँकेच्या ट्रेझरी शाखेसमोर सर्व बँक कर्मचाऱ्यांनी एकत्र येत जोरदार निदर्शने केली. मार्च २०२४ मध्ये झालेल्या द्विपक्षीय करारामध्ये पाच दिवसीय बँकिंग आठवड्याची मागणी मान्य करण्यात आली होती. मात्र, या कराराला जवळपास दोन वर्षे पूर्ण होत असतानाही अद्याप त्याची अंमलबजावणी झालेली नाही. या अंमलबजावणीतील दिरंगाईमुळेच बँक कर्मचाऱ्यांना संपाचा मार्ग स्वीकारावा लागला, अशी माहिती स्टेट बँक वर्कर्स ऑर्गनायझेशनचे सरचिटणीस राजेश मुळे यांनी दिली. सध्या बँक कर्मचाऱ्यांवर कामाचा प्रचंड ताण आहे. पाच दिवसांचा कामकाजाचा आठवडा लागू झाल्यास कर्मचाऱ्यांना त्यांच्या कौटुंबिक व वैयक्तिक आयुष्यासाठी वेळ देता येईल, असे मुळे यांनी नमूद केले. बँक कर्मचारी यांच्या कामकाजात सातत्याने ताणतणाव असतो त्यामुळे त्यांना काहीसा दिलासा मिळणे देखील गरजेचे आहे. इन्शुरन्स, रिझर्व्ह बँक, तसेच शेअर मार्केटसह अनेक वित्तीय संस्थांमध्ये पाच दिवसीय कामकाजाची अंमलबजावणी होत असताना, बँकिंग क्षेत्रात मात्र याबाबत होत असलेल्या दिरंगाईमुळे कर्मचाऱ्यांमध्ये तीव्र नाराजी आहे. केंद्र सरकारने लवकरात लवकर पाच दिवसीय बँकिंग आठवड्याची अंमलबजावणी न केल्यास, भविष्यात आणखी तीव्र स्वरूपाची आंदोलने व संप करण्यात येतील, असा इशाराही राजेश मुळे यांनी दिला.
Source link
