हाँगकाँगमध्ये माजी मीडिया व्यावसायिक जिमी लाई यांना राष्ट्रीय सुरक्षा प्रकरणात दोषी ठरवण्यात आले आहे. आता त्यांना जन्मठेपेची शिक्षा होऊ शकते. 78 वर्षीय लाई चीनचे विरोधक आणि लोकशाहीचे समर्थक राहिले आहेत.

लाई पूर्वी ‘ऍपल डेली’ हे वृत्तपत्र चालवत होते. हे वृत्तपत्र हाँगकाँग सरकार आणि चीनच्या कम्युनिस्ट पक्षाचा उघडपणे विरोध करत असे.

जिमी लाई यांना ऑगस्ट 2020 मध्ये राष्ट्रीय सुरक्षा कायद्यांतर्गत अटक करण्यात आली होती. हा कायदा 2019 मध्ये झालेल्या मोठ्या सरकारविरोधी निदर्शनांनंतर आणण्यात आला होता.

5 वर्षांनंतर, न्यायालयाने लाई यांना परदेशी शक्तींशी संगनमत करण्याचा कट रचल्याबद्दल आणि त्यांच्या वृत्तपत्राद्वारे देशद्रोही बातम्या प्रकाशित केल्याबद्दल दोषी ठरवले. तथापि, लाई यांनी सर्व आरोपांचा इन्कार केला होता आणि स्वतःला निर्दोष म्हटले होते.

न्यायालयाच्या या निर्णयाकडे बीजिंगच्या आंतरराष्ट्रीय संबंधांची कसोटी म्हणूनही पाहिले जात आहे. अमेरिकेचे राष्ट्राध्यक्ष डोनाल्ड ट्रम्प यांनी सांगितले आहे की, त्यांनी जिमी लाई यांचा मुद्दा चीनसमोर मांडला होता.

ब्रिटनचे पंतप्रधान कीर स्टारमर यांनी म्हटले आहे की, त्यांचे सरकार जिमी लाई यांच्या सुटकेला प्राधान्य देत आहे, कारण जिमी लाई हे ब्रिटिश नागरिक आहेत. हाँगकाँग पूर्वी ब्रिटनची वसाहत होती, जे 1997 मध्ये चीनच्या नियंत्रणाखाली आले.