मेटा ट्रान्सलेशन टेक न्यूज: गेल्या काही वर्षांमध्ये सोशल मीडियाच्या वापरामध्ये प्रचंड वाढ झाली असून, त्यामध्ये मिळणाऱ्या सुविधासुद्धा तितक्याच झपाट्यानं वाढल्या. अगदी आयजीटीव्हीपासून ते सध्याचे रील्स किंवा शॉर्ट्स इतक्या प्रमाणात लोकप्रिय झाले की या तंत्रज्ञानानं अनेकांनाच थक्क केलं. असं असलं तरीही या सर्व गोष्टी तांत्रिक असून, त्यांच्यातही काही त्रुटी आहेत हे खरं. याचीच प्रचिती नुकतीच एका प्रतिष्ठीत नेत्याच्या बाबतीत घडलेल्या प्रसंगावरून दिसून आली. जिथं चक्क एका राज्याच्या मुख्यमंत्र्यांबाबत एक चुकीचं वाक्य मेटा (मेटा) या सोशल मीडिया प्लॅटफॉर्मनं जारी केलं आणि तिथं सोशल मीडियामुळं झालेला गोंधळ लक्षात आला.
पोस्टमध्ये लिहिलेलं…
कर्नाटकचे मुख्यमंत्री सिद्धरामैया यांनी सोशल मीडियावर एक शोकसंदेश लिहिला. मात्र मेटानं त्याचा चुकिचा अनुवाद करत थेट मुख्यमंत्र्यांनाच ‘मृत’ घोषित केलं. मुख्यमंत्री कार्यालयाच्या (CMO) वतीनं ही पोस्ट फेसबुकवर शेअर करण्यात आली होती. जिथं ज्येष्ठ अभिनेत्री बी सरोजा देवी यांच्या निधनासंदर्भात एक पोस्ट लिहिली. जिथं त्यांनी लिहिलं, ‘Chief Minister Siddaramaiah passed away yesterday multilingual star, senior actress B. Took darshan of Saroja devi’s earthly body and paid his last respects.’
मूळ कन्नड भाषेमध्ये लिहिण्यात आलेली पोस्ट इंग्रजीत अशा प्रकारे अनुवादित करण्यात आली जिथं सिद्धरामैया यांनाच मृत घोषित करण्यात आलं आणि नेटकऱ्यांमध्ये प्रचंड संभ्रमाचं वातावरण पाहायला मिळालं. काहींनी चिंतेचा सूरही आळवला. कारण, ही पोस्ट अनुवादित करताना मेटानं थेट सिद्धरामैया यांचं निधन झाल्याचं सांगितलं आणि वाचणाऱ्यांचा त्याच्याच डोळ्यांवर विश्वास बसेना.
ऑटो-ट्रांसलेशन फिचरवर मुख्यमंत्र्यांची नाराजी
मुख्यमंत्री सिद्धरामैया यांनी मेटाच्या या चुकीवर आणि ऑटो-ट्रांसलेशन फिचवर तीव्र संताप व्यक्त करत हे फिचर तात्काळ बंद करण्याची मागणी केली. अशा प्रकारचा चुकीचा अनुवाद आणि माहिती कित्येकांची दिशाभूल करू शकते हा मुद्दा त्यांनी उचलून धरला.
मुख्यमंत्र्यांचे माध्यम सल्लागार केवी प्रभाकर यांनी मेटाला एर अनौपचारिक पत्र लिहित सदर भाषांतराला दिशाभूल करणारं आणि धोकादायक असल्याचं स्पष्ट केलं आणि मेटाला आग्रह करत कानडी भाषेतील तज्ज्ञांच्या सल्ल्यानुसार भाषांतराची गुणवत्ता सुधारण्याची मागणी केली.
देशातील आघाडीच्या नेत्यांसमवेत झालेल्या या घटनेमुळं एआय अर्थात कृत्रिम बुद्धिमत्तेच्या आधारावर अनेक गोष्टी हल्लीच्या दिवसांमध्ये अवलंबून असल्या कारणानं संवेदनशील विषयांवर ही सुविधा किती विश्वासार्ह आहे हाच प्रश्न उभा राहत आहे. शिवाय घडल्या प्रकारानंतर खुद्द सिद्धरामैया यांनीसुद्धा एआयच्या मदतीनं होणाऱ्या भाषांतरांच्या बाबतीत सतर्क राहण्याचं आवाहन सोशल मीडिया वापरकर्त्यांना दिली.
