इन्फोसिस नवीन कर्मचारी धोरणे: (Private Sector Jobs) खासगी क्षेत्रांमध्ये नोकरी करणाऱ्या कर्मचाऱ्यांच्या कामांच्या तासांपासून ते अगदी त्यांच्या (Salary) पगारापर्यंत अनेक गोष्टी कायमच चर्चेचा विषय ठरतात. त्यातच जेव्हाजेव्हा हे मुद्दे चर्चेत येतता तेव्हातेव्हा बऱ्याच काळापूर्वी इन्फोसिसचे सहसंस्थापक (Narayana Murthy) नारायण मूर्ती यांनी केलेल्या एका वक्तव्याचीसुद्धा बरीच चर्चा होते.

ही चर्चा म्हणजे कर्मचाऱ्यांसाठी 70 तासांचा कार्यालयीन आठवडा असावा, या त्यांच्या वक्तव्याची. एकिकडे मूर्ती यांनी नव्या पिढीकडून अधिकाधिक उत्पादनक्षम कामाची अपेक्षा जाहीररित्या बोलत आपली ठाम भूमिका मांडली. मात्र आता त्यांच्याच कंपनीनं कर्मचाऱ्यांना नोकरी आणि खासगी आयुष्यात संतुलन राखण्याच्या सल्लापर सूचना करत लक्ष वेधलं आहे. एका अर्थी मूर्ती यांना घरचाच अहेर मिळाला असं म्हणणं इथं गैर ठरणार नाही.

नियमित कार्यालयीन तासांमध्ये काम करा…

इन्फोसिसच्या (Bengaluru) बंगळुरू येथील मुख्यालयाकडून कर्मचाऱ्यांना एक Email पाठवण्यात आला आहे, ज्यामध्ये त्यांना नियमित कार्यालयीन तासांमध्येच काम करण्याच्या सूचना करण्यात आल्या आहेत. प्रामुख्यानं कार्यालयाबाहेरून अथवा Work From Home करत असणाऱ्यांनी याची विशेष काळजी घ्यावी असंही मेलमध्ये म्हटलं आहे. ज्या कर्मचाऱ्यांना हा ईमेल मिळाला आहे त्या कर्मचाऱ्यांनी मागील महिन्यामध्ये सरासरीच्या तुलनेत अधिक वेळापर्यंत काम केल्यानं त्यांना या सूचना करण्यात आल्या आहेत.

जास्त काम कराल, तर ई-मेल येईल!

कंपनीतील एका कर्मचाऱ्यानं प्रतिष्ठीत माध्यमसमुहाशी संवाद साधताना दिलेल्या माहितीनुसार कंपनीमध्ये साधारणत: पाच दिवसांचा कार्यालयीन आठवडा असून, दर दिवशी कर्मचाऱ्यांनी 9 तास 15 मिनिटं काम करणं अपेक्षित आहे. वर्क फ्रॉम होमदरम्यान जर याहून अधिक वेळ काम केलं तर, ही बाब लक्षात घेत ती अधोरेखित केली जाते. कर्मचारी किती वेळ काम करत आहेत यावर HR विभागाकडून पूर्ण लक्ष ठेवलं जातं आणि एखाद्या कर्मचाऱ्यानं निर्धारित वेळेहून अधिक काम केलं तर मात्र त्यांना ई-मेल पाठवण्यात येतो.

कंपनी घेतेय कर्मचाऱ्यांची काळजी…

कंपनीकडून पाठवण्यात येणाऱ्या मेलमध्ये कर्मचाऱ्यांना आपल्या आरोग्याची काळजी घेण्यासमवेत ‘वर्क लाईफ बॅलेन्स’ करण्याच्याही सूचना केल्या जातात. जेणेकरून कामाच्या वेळेत त्यांना प्रभावीपणे पूर्ण लक्ष कामावरच केंद्रीत करता येईल. कंपनीच्या एचआर विभागानं या मेलमध्ये म्हटलं, ‘आम्हाला तुमची कामाप्रती असणारी बांधिलकी आणि जबाबदारी लक्षात येते. मात्र आम्हाला असंही वाटतं की, एक सकारात्मक संतुलन राखणं तुमच्या चांगल्यासाठी आणि दीर्घ काळ चांगलं यश मिळवून देण्यासाठी महत्त्वाचं ठरेल’.

सुट्टीच्या दिवशी कामाची चर्चाच नको…

अनेकदा कामाचा वाढता ताण पाहता कामाचे तास वाढतात. मात्र अशा वेळी मध्ये मध्ये विश्रांती घेणंही गरजेचं असल्याचं म्हणत कामाचा ताण येत असल्यास त्याचा प्राधान्यक्रम निर्धारित करण्यासाठी Team Manager सोबत चर्चा करण्याचा सल्ला कंपनीनं दिला आहे. इतकंच नव्हे, तर कामातून मिळणाऱ्या सुट्ट्या कामाचा ताण कमी करण्यासाठी असून, शक्य आहे तितक्यांदा यादरम्यान कामाची चिंता आणि चर्चा न केलेलीच बरी असंही या मेलमध्ये स्पष्टच सांगण्यात आलं आहे.

कर्मचाऱ्यांसाठी नवनवीन सुविधा…

2023 पासून इन्फोसिसनं सव्वातीन लाखहून अधिक कर्मचाऱ्यांसाठी ‘हायब्रिड’ वर्क मॉडेलच्या दिशेनं पावलं उचलली. जिथं, कर्मचाऱ्यांनी महिन्यातून फक्त 10 दिवसच ऑफिसला येऊन काम करणं अपेक्षित असल्याचं सांगितलं.

एकिकडे नारायण मूर्ती यांचं 70 तासांच्या कार्यालयीन आठवड्याबाबतचं वक्तव्य आणि दुसरीकडे कंपनीनं कर्मचाऱ्यांच्या हिताच्या दृष्टीनं केलेला विचार पाहता सध्या इन्फोसिसच्या या नव्या धोरणाचं कर्मचारी वर्गाकडून कौतुक होत आहे. इतकंच नव्हे, तर आपआपल्या संस्थांनीसुद्धा यातून आदर्श घेत कर्मचाऱ्यांची पिळवणूक आणि फसवणूक टाळावी असाही सूर खासगी क्षेत्रातील कर्मचारी वर्गानं आळवल्याचं पाहायला मिळत आहे.