कोळवण ते पौड मार्गावर मोफत बससेवा सुरू : आमदार शंकर मांडेकर यांच्या पुढाकाराने विद्यार्थ्यांना व नागरिकांना दिलासा
मुळशी (पौड दि.19) : चाले (ता. मुळशी) येथील पुलाचे काम सुरू असतानाच सुरु झालेल्या पावसामुळे तयार केलेला पर्यायी मार्ग पाण्याखाली गेला असून, सुरक्षिततेच्या कारणास्तव रस्ता वाहतुकीसाठी बंद करण्यात आला आहे. त्यामुळे कोळवण खोऱ्यातील १६ गावांचा पौडशी संपर्क तुटला आहे. या पार्श्वभूमीवर आमदार शंकर मांडेकर यांच्या पुढाकाराने कोळवण ते पौड या मार्गावर मोफत बससेवा सुरू करण्यात आली आहे.
वाहतूक बंद झाल्यामुळे बससेवा ठप्प झाली होती. परिणामी, शालेय व महाविद्यालयीन विद्यार्थी, ज्येष्ठ नागरिक, महिला यांना मोठ्या अडचणींना सामोरे जावे लागत होते. या समस्येकडे राष्ट्रवादी काँग्रेसचे तालुकाप्रमुख अंकुश मोरे, माजी जि.प. सदस्य शांताराम इंगवले, माजी सभापती रवींद्र कंधारे, महादेव दुडे, बबन धिडे व यशवंत गायकवाड यांनी लक्ष वेधले. त्यानंतर आमदार मांडेकर यांनी तत्काळ हस्तक्षेप करत बुधवारपासून (ता. १८) मोफत बससेवेचा शुभारंभ केला.
ही बससेवा नागरिकांसाठी आणि विद्यार्थ्यांसाठी मोठा दिलासा ठरली आहे. बस प्रवासासाठी ९९२२४६६१७१ आणि ९८२२४४६१७१ (सचिन भरम) यांच्याशी संपर्क साधावा, असे आवाहन करण्यात आले आहे.
बस सेवा वेळापत्रक पुढीलप्रमाणे :
➤ सकाळी ६.३० वा. – कोळवण-चाले-हनुमान चौक-घोटावडे फाटा-पौड एस.टी. स्टँड
➤ दुपारी १२ वा. – पौड-घोटावडे फाटा-हनुमान चौक-घोटावडेगाव-चाले-कोळवण
➤ दुपारी ४.३० वा. – कोळवण-चाले-घोटावडेगाव-हनुमान चौक-घोटावडे फाटा-पौड एस.टी. स्टँड
➤ सायंकाळी ६ वा. – पौड-दारवलीगाव-भरेफाटा-हनुमान चौक-घोटावडेगाव-चाले-कोळवण
चाले पुलाचे काम पूर्ण होईपर्यंत ही मोफत सेवा सुरू राहणार असून, कोळवण खोऱ्यातील विद्यार्थी, नागरिक आणि कामगारांनी या सुविधेचा लाभ घ्यावा, असे आवाहन आमदार शंकर मांडेकर यांनी केले आहे.
