येथे महिला आहेत, लघुशंका करू नका, असे म्हटल्याचा राग आल्याने जामखेड येथील विंचरणा नदीच्या नवीन पुलावर रविवारी रात्री १० वाजता तरुणावर गोळीबार करणाऱ्या छत्रपती संभाजीनगर जिल्ह्यातील ६ आरोपींना पोलिसांनी प्रवरा संगम येथे जेरबंद केले आहे.
?
प्रभू रायभान भालेकर (३३, रा. निपाणी, छत्रपती संभाजीनगर), नकुल विष्णू मुळे (४०, रा. खेडा, ता. पैठण), शरद अंकुशराव शिंदे (३८, रा. पुसेगाव, ता. पैठण), गणेश गोविंद आरगडे (३०, रा. खंडाळा, ता. पैठण), रावबहादूर श्रीधर हरकळ (३५, रा. सारासिद्धी सोसायटी, बीड बायपास, छत्रपती संभाजीनगर), सुशील ताराचंद गांगवे (३०, रा. पद्मपुरा, छत्रपती संभाजीनगर) अशी संशयितांची नावे आहेत.
आदित्य बबन पोकळे (२०) याच्या घरासमोर रविवारी रात्री १० वाजता विंचरणा नदीजवळ काही महिला आणि नागरिक बसले होते. या वेळी कारमधून उतरलेल्या तिघांनी तिथे लघुशंका करण्यास सुरुवात केली. आदित्य याने त्यांना येथे लघुशंका करू नका, महिला आहेत, असे सांगितले. याचा राग आल्याने त्या तिघांनी आदित्यला शिवीगाळ करत लाथाबुक्क्यांनी मारहाण केली. कुणाल बंडू पवार (रा. जामखेड) याच्यासह आदित्यवर आरोपींनी गोळीबार केला.
